(Manatuto) estadium – Ministru Joventude Desportu Arte no Kultura (MJDAK) hamutuk ho Federasaun Futebol Timor-Leste (FFTL), apoiu Jogu Liga Futebol Timor-Leste (LFTL) hodi realiza abertura Primeiru Divizaun Liga Futebol Timor-Leste (LFTL) iha Munisípiu Manatuto.
Prezidente Autoridade Munisípiu (PAM) Manatuto agradese ba Federasaun Futebol Timor-Leste, Ministériu Joventude Desportu Arte no Kultura no mós Liga Futebol Timor-Leste ne’ebé mak hili Múnisípiu Manatuto sai hanesan fatin ba realiza abertura Primeiru Devijaun Liga Futebol Timor-Leste.
“Agradese tebes ba federasaun ho Ministru Joventude desportu bele hili Manatuto hanesan fatin ne’ebé atu hahú abertura iha epoka ida ne’e, nune’e ita hatene katak kampu ida ne’e tuir ami nia hatene sidauk inagura felismente tamba nesesidade ita utiliza dadaun ona depois mak ha’u hanoin atu inagura ka la inagura ne’e husi Ministeriu Joventude Desportu mak organiza fali”, Dehan PAM Manatuto Luis Inacio Henriques iha estadiun Manatuto, foin lalais ne’e
Nia dehan importante ba hahoris atividade iha sira nia Munisípiu durante ne’e atividade la dun lao, hafoin sira nia ekipa futebol AD SLB LAULARA, halo atividade barak iha Díli infelismente sira seidauk iha klubu profisionál iha Munisípiu Manatuto, ho hanoin hafoin liga ne’e la’o iha Manatuto bele ona iha vontade populasaun, tanba Munisípiu Manatuto mós iha ona klubu profisionál atu kompete iha liga tuir mai.
Iha fatin hanesan Prezidenti Liga Futebol Timor-Leste (LFTL), Ipolitu Soares, haktuir katak, nia agradese ba Governu no Estadu Timor-leste ne’ebé ajuda fundus hodi realiza liga futebol Timor-Leste no mós ba federasaun futebol Timor-Leste, no respeita ba treinador selesaun nasional durante ne’e hare selesaun nasionál hodi partisipa iha komisaun globál,
Nune’e Ministru Joventude Desportu Arte no kultura, Nelio Isaac Sarmento, hatutan, hanesan previleziu ida sira bele hala’o abertura ba jogu Liga Futebol primeiru divizaun iha Munisípiu Manatuto.
“Previleziu ida ohin ita bele hala’o abertura jogu Liga Futebol primeru divijaun iha Munisípiu ida ne’e, no primeira vez iha Manatuto mezmu estadium ne’e seidauk inaugura, estadium ne’e ita sei inagura iha fulan ida mai tan tanba infraestrutura iha estadium ne’e iha buat balun ne’ebé seidauk kompletu, no presija atu kompleta, entaun kampu kompletu ona iha kondisoeñs infraestrutura iha Timor laran tomak sei iha hela kostrusaun só úniku Munisípiu Manatuto mak iha kondisoeñs naton atu realiza primeiru jogu Liga Futebol Timor-Leste ita realiza iha ne’e
mak komesa ohin ba oin iha kampu ida ne’e sei akontese jogus barak tan iha Liga Primeiru Divijaun, tuir iformasaun ohin joga abertura aban sei iha tan klubu balun sei joga tan iha kampu ne’e”, dehan MJDAK.
Nelio Isaac Sarmento dehan, dezenvolve futebol hakarak la’o iha Munisípiu hotu-hotu ida ne’e polítika mós, hanoin lori futebol ba Munisípiu mezmu iha Munisípiu balu iha kondisoeñs infreastrutura seidauk kompletu, maibé la’os signifika katak la ba, neneik sei to’o iha ne’eba, no nia husu ba Autoridade Regulador futebol Timor-Leste inklui liga futebol governu nia responsabilidade mak fó ápoiu tomak entermus finansamentu no mós fó infraestrutura ne’ebé atu uza ba jogu.
“Maibé ita ko’alia kona-ba regras ne’e orgaun sira nia responsabilidade tanba ne’e klubu sira hotu-hotu partisipa iha Liga Futebol Primeiru Divijaun no Segundu Divijaun imi nia publikasaun atu kumpri regulamentu ka regras ida ne’ebé iha Federasaun Futebol no mós iha Liga Futebol Timor-Leste so úniku ida ne’e mak lori ita nia jogador sira respeita malu no iha responsabilidade ba jogu no mós sai ezemplu ba futuru jogador sira ne’ebé sei mai”, nia hakotu.
Entretantu iha jogu ne’e sei hetan apoiu orsamentu husi Ministériu Joventude Desportu Arte no Kultura (MJDAK) ho montante $ 500,000.00 no Federasaun Futebol Timor-Leste (FFTL) mós apoiu orsamentu ho montante $ 200,000.00 no totál apoiu husi MJDAK no FFTL ba Liga Timorense hamutuk $ 700.000.00.
Jornalista: Rogerio Anuno
Editora: Gaudencia Belo
