(Díli) Mudansa – Sarani katólika Timor-Leste kontenti tebes ho antosiazmu hodi la’o ain husi ida-idak nia hela fatin bá hamriik iha pontu entrada hein Sua Santidade Papa Francisco mai Timor-Leste.
“Hau hanesan komisaun organizadóra ida no hanesan mós sarani kristaun hanoin katak Sua Santidade Papa Francisco to’o iha Timor-Leste mais ou menus tuku rua liu iha Oras Timor-Leste nian, to’o ona iha ita nia rai Timor,ita Timor-Leste maiória relijiaun Katólika ita tenki hein iha dalan ninin Amu Papa atu liu mai, ita hotu hatene katak ita nia Sua Santidade Papa Francisco atu mai vizita iha ita nia rai doben ida ne’e lori tinan naruk no loron naruk nian laran prosesu naruk tebes mak ohin loron bele sama ain iha ita nia rai doben Timor-Leste,”Dehan komisaun organizadóra Paroquia Balide Carlito Dos Santos bá Jornálista Media Mudansa iha Farol Segunda-Feria (09/09/24)
Komisaun ne’e esplika,sarani hotu hamutuk simu nia hanesan kristu ne’ebé mai hamutuk iha rai Timor-Leste ida ne’e hodi simu bensaun husi Sua Santidade Papa rasik.
“Ha’u hanesan komisaun hanesan mós sarani ida ami organiza no akompaña ita nia sarani hotu hosi Paroquia Balide sai hosi Paroquia Balide tuku 09:00 Otl, hodi mai to’o fatin ida ne’e hodi hein ita nia Sua Santidade Papa Francisco atu hakat mai rai doben Timor-Leste ida ne’e,”Tenik Komisaun organizadóra Paroquia Balide Carlito
Nia akresenta,Sarani ne’ebé sai hosi Paroquia Balide barak tebes kompostu hosi feto no mane labarik ki’ik, Joven, Ferik, Katuas sira la’o ain husi Balide no balu husi sira nia fatin mai to’o iha ne’e mais ou menus sarani besik rihun ida resin mak mai hein Santu Padre.
“Bá ita nia sarani Katólika tenki halo tuir no fiar metin ita nia relijiaun Katólika nian ita moris Jesus fó dalan bá ita hanesan sarani kristaun ita tenki fiar metin iha ita nia relijiaun ho ita nia kúltura ne’ebé ohin loron ita moris iha mundu ida ne’e,” Tenik Nia
Iha sorin seluk sarani hosi Paroquia Bedois,Domingos Soares mós hateten, nia senti kontenti,tanbá hela de’it oras balun nia laran Sua Santidade Papa Francisco to’o ona iha Timor-Leste.
“Ha’u hanesan sarani ida ha’u senti kontenti tebes tanbá hela de’it oras ka minutu balu hodi haree Sua Santidade Papa Francisco nia oin,ita nia Papa Francisco nia vizita ida ne’e bá dala rua uluk Papa João Paulo II no agora ita nia sua santidade Papa Francisco no ha’u ho Antosiazmu tebes bá Timoroan hotu orgullu tebes bá sarani Katólika Timor-Leste,tanbá Santu Padre mai iha ita nia rai Timor-Leste ida ne’e tama bá dala rua ona,ha’u husu bá sarani Katólika Timor-Leste nian hotu kontenti simu ho di’ak hanoin ho di’ak hodi ita nia Santu Padre mai ne’e haraik bensaun ida bá ita nia nia rai dame paz hakmatek no bele iha mudansa di’ak liu tan,”Nia subliña
Nia hateten,nia hakarak iha loron 11 Santu Padre enkontru ho Joven sira hotu hosi Sentru Konvensaun Díli (CCD sigla Portugés) no sai hosi rai doben ida ne’e fila-fali bá Vatikanu husu bo’ot no Grasa ida bá Timor-Leste bele iha mudansa ho di’ak.
Tuir observasaun husi Jornálista Media Mudansa nian iha terenu nota katak sarani hosi Paroquia Katedrál Bedois, Sagrada Korasaun Jesus, Balide, ohin dadeer kedas la’o ain hosi hosi ida-idak nia fatin mai to’o iha pontu entrada Mandarin hodi hamriik kaer Bandeira Timor-Leste no Bandeira Vatikanu nian hananu maski loron manas,maibé sarani sira nafatin hamriik firme hodi hein prezensa Santu Padre nian husi Mandarin mai to’o Nunsiatura Apostolika Motael nian.
Jornalista: Esperança Monteiro Soares
Editóra: Delfina Borges
