(Díli)Mudansa– Porta-Voz Tomasia Vila-Nova liu husi hatete,kazu estudante feto ids orienta hela nia teze to’o rezulta liman fatin mosu iha vitima nia órgaun sensitivu ne’ebé mak orientadór ne’e ka’er no buti bá halo vitima trauma no atu tanis iha ne’ebá.
Porta-Voz akresenta,tuir kronologia ne’ebé sira movimento Rosas Mean hetan husi públikasaun Jornal Independente katak Fana la’os naran loos nu’udar estudante feto ida husi Universidade da Paz, dau-daun ne’e orienta hela nia teze.
“Iha loron 24 fulan Jullu tinan 2024, tuku 13:45 Otl, liu husi “via WhatsApp” suspeitu ho inisiál DT nu’udar vitima nia dosente orientador husi Universidade da Paz (UNPAZ) haruka vitima ba hasoru iha orientadór nia servisu fatin atu orienta,no vitima mós to’o duni iha orientador nia servisu fatin no remata orienta vitima atu fila maka mosu asediu seksual,orientadór ne’e dada vitima nia liman hodi kaer no buti vitima nia órgaun sensitivu hirus matan nian no halo vitima hakfodak no trauma hodi hikis-an, maibé orientadór ne’e nafatin ka’er metin vitima-nia liman hodi dada vitima no dehan nia hakarak ka’er tan vitima-nia isin,”
dehan Porta-Voz Tomasia Vila-Nova Jornalista Media Mudansa iha Peace Center Caicoli,sesta-Feira(09/08/24)
Nia afirma,Rosas Mean nu’udar Movimento sosial ne’ebé inspira husi luta Rosa Muki Bona Parte nian iha tempu resistensia Muki luta makas ba emansipasaun feto, oinsa atu kore feto no povu maubere hotu husi ignoransia no luta ba libetasaun ida kompletu,ohin loron luta ida ne’e fanun sira atu kontinua luta ba emansipasaun feto sira no povu maubere nian, Movimento Rosas Mean nu’udar mata dalan ba luta feto nian bá mundu ne’ebé justu, loloos hanesan no Solidariu.
Iha fatin hanesan estudante Ivonia Baisarek mós hatutan,akontesimentu ne’e, vitima hato’o problema ne’e ba dosente nain-rua husi Fakuldade Direitu ne’ebé hatudu dalan lós ba vitima hodi prosesa tuir dalan legál ne’ebé vigora iha rai RDTL.
“Bazea ba kronologia hirak ne’e, ami husi Movimento Rosas Mean la konkorda total ho aktu asedu sexual ne’ebé komete husi Dosente Universidade da Paz (UNPAZ) hasoru estudante refere, ho ida ne’e ami ezizi atu husu ba parte Universidade hodi fó sansaun disiplinar ne’ebé rigorosu bà dosente,ami husu ba Komissaun F Parlamentu Nasional atu levanta kazu ne’e ba Ministeriu Pubiku hodi asselera lalais problema,husu mós ba Institusiaun PDHJ atu akompaña kazu ne’e to’o dezisaun final iha Tribunal,” Nia relata
Nia husu bá Ensino Superior no Ministeriu Edukasaun atu la’os suspende de’it autor bá kazu,maibé hasai mós nia titulu akademiku nu’udar sansaun disiplinar,no husu bá entidades relijiosa liu-liu Igreja Katolika atu konsensializa sarani sira hodi respeita malu nu’udar umanidade tuir ukun fuan Igreja.
“Husu bá sosiedade sivil hanesan, AJAR, Rede Feto, Fundasaun Alola,ALFELA, FOKUPERS, MOFFE, hak, Plan Internacional, Sivitas akademiku sira hotu atu foti mós pozisaun ba kazu refere,bá Institusaun hotu-hotu iha Timor laran tomak atu labele viola Direitus Umanus liu-liu Liberdade de espresaun estudante sira nia,bá estudante hotu-hotu, servisu nain, atu koalia sai hahalok inmoral ne’ebé komete husi pessoal sexista balun hasoru ita boot sira iha kualker tempu no kualker fatin.” Ivonia Baisarek Hakotu
Jornalista: Inácio Silva
Editóra : Delfina Borges
