(Díli) Mudansa- Prezidente Repúblika (PR), José Ramos-Horta hateten iha nia diskursu katak, hodi sira nia naran, hodi Povu tomak nia naran no nia naran rasik, hato’o benvindu bá belun bo’ot Sekretáriu-Jerál Nasoins Unidas António Guterres.
“Iha Tinan 2024 ida ne’e, nakonu ho akontesimentu bo’ot balun, iha Timor-Leste ami marka tinan 50 Revozlusaun Ai-funan (Revolução dos Cravos) ne’ebé furak, revolusaun ne’ebé liga ami hotu nia luta koletiva bá liberdade, demokrásia no auto-determinasaun Povu sira nian, tinan 25 hosi Akordu Nova Yorke nian iha loron 5 fulan maiu tinan 1999, ne’ebé hametin dalan bá ami nia liberdade,hodi hodi ita boot sira nia naran, hodi ami nia Povu tomak nia naran no ha’u nia naran rasik hato’o benvindu bá belun bo’ot Sekretáriu-Jerál Nasoins Unidas António Guterres,”dehan Prezidente Repúblika iha nia diskursu, hafoin jantar hamutuk iha Palacio Nobre Lahane, kinta-feira (29/08/24)
Governante dehan, Ohin sira hanoin hikas selebrasaun sira ba dala-XXV, Aniversáriu Konsúlta Popúlar nian,nia saúda ema ida ne’ebé maka sai nu’udar Sekretáriu-Jerál bo’ot ida Nasoins Unidas nian,iha nia diskursu tomada pose, Kofi Annan kompromete-an atu rezólve kestaun Timor-Leste durante nia mandatu dahuluk entre tinan, Kofi Annan kumpri duni nia promesa.
“Ami marka iha tempu badak tinan 25 dezde formasaun Forsa Internasionál bá Timor-Leste (INTERFET), ne’ebé hetan autórizasaun ho unanimidade hosi Konsellu Seguransa iha loron 15 fulan-setembru, ha’u hakru’uk bá memória belun bo’ot ida nian, matebian Francesc Vendrell, funsionáriu superiór katalaun ida ne’ebé serbí Nasoins Unidas husik hela mai ami iha tinan 2022 ho legadu naruk ativizmu no defeza bá kauza Timoroan nian,” PR Horta subliña
Nia akrésenta, hanoin hikas Sérgio Vieira de Mello nia mate trájiku iha loron 19 fulan agostu tinan 2003 iha Irak,Diplomata brillante ne’ebé servisu ba ONU ho legadu importante iha misaun umanitária no reprezentante espesiál Sekretáriu-Jerál ONU nian iha Timor-Leste, entre tinan 1999 no loron 21 fulan-maiu 2002.
“Iha ami-nia leet iha ema xave na’in-rua iha istória envolvimentu ONU nian ho Timor-Leste,Tamarat Samuel no Ian Martin sira na’in-rua iha ligasaun íntima no nafatin ho istória dignu, orgullu ONU nian ida-ne’e ho TimorLeste no iha Timor-Leste,tanbà ne’e, ha’u rejista ami-nia apresiasaun kle’an bá Prezidente no Primeiru-Ministru tuir malu hotu Portugál nian, Partidu Polítiku sira ne’ebé iha no laiha kadeira iha Asembleia Repúblika Portugal,ha’u destaka ami-nia belun doben sira Prezidente Ramalho Eanes, Mário Soares no Jorge Sampaio, Primeiru-Ministru António Guterres, José Durão Barroso, Xefe Estadu Angola, Brasil, Cabo Verde, Guiné-Bissau, Moçambique no São Tomé e Príncipe, ne’ebé sira sempre hamutuk ho ami iha jornada tomak ami-nia luta ba Libertasaun Nasionál,”Nia esplika
PR Horta akresenta, la haluha iha okaziaun espesiál ida-ne’e, Primeiru-Ministru John Howard, Prezidente Bill Clinton, Primeiru-Ministru Tony Blair, Prezidente Kim Dae Jung (husi Koreia-Súl), no sira nia lideransa ne’ebé maka permite konsensu iha Konsellu Seguransa, fó naroman matak bá International Force for Timor-Leste – INTERFET.
Jornalista : Ana Ribeiro
Editóra : Delfina Borges
