(Dili) Mudansa-Bankada Partidu Demokrátiku (PD), haksolok ho onra prezensa Sekretariu Jerál Organizasaun Nasoins Unidas (ONU), iha uma magna Timor nian hodi selebra aniversáriu referendum konsúlta popúlar nian bá Dala-XXV.
“Ho satisfasaun bo’ot mak ohin lori Bankada Parlamentar Partidu Demokrátiku nia naran simu ho laran-haksolok ho onradu prezensa SekJer ONU iha ne’e iha uma Magna Povu Timor nian ida ne’e hodi selebra aniversáriu referendu tinan 1999 bà dala-XXV,” dehan Bankada PD António da Conseição “Kalohan” bá Jornálista iha PN, kinta-feira (30/08/24)
Governante ne’e akresenta, sente orgullu atu selebra momentu istóriku ida-ne’e hodi rekoñese papél krusiál ne’ebé ONU hala’o iha prosesu rezolusaun konflitu armadu ne’ebé liu durante tinan 24.
“Ita nia rezisténsia hasoru invazór, nune’e mós ami nia ksolok atu agradese ita-bo’ot nu’udar Primeiru-Ministru Governu Konstitusionál bá dala-XIII, no dala-IV entre tinan 1995 no 2002, ne’ebé liu husi ita bo’ot nia Ministru Negósiu Estranjeiru Jaime Gama halo esforsu maka’as hodi tuur iha meza negosiasaun ho Indonézia ne’ebé patrosina hosi ONU hodi rezolve kauza Timor nian ne’ebé kulmina iha akordu loron 5 fulan Maiu iha Nova Yorke,” Governante ne’e afirma
Governante ne’e subliña, ONU hala’o papél desizivu iha Timor-nia kazu, susar atu nega tarefa dezafiante ne’ebé Ian Martin atua iha momentu krítiku hanesan reprezentante espesiál hosi Sekretáriu Jerál Nasoins Unidas (ONU), nian hodi organiza referendum iha tinan 1999.
“Ohin loron ita nu’udar Nasaun livre no Independente, ami senti orgullu, tanbá ami nia eroi sira ne’ebé maka lidera ami nia luta iha foho sira hosi rai-inan okupadu nian prezente mós ho ami iha ne’e, ohin hato’o ami nia respeitu bá Maun Boot Kayrala, Komandante Taur Matan Ruak nia kolaborador, Maun Francisco Guterres Lu-Olo, Gerrilleiru, Komandante Lere Anan Timor, no Gerrilleiru barak seluk ne’ebé sei moris, iha ámbitu diplomátiku, ami orgullu ho tenasidade, insisténsia no diplomasia persistente ne’ebé ezerse hosi ita-nia Prezidente Repúblika atuál Jose Ramos-Horta, wainhira moris iha diaspora, sempre sai sasin bá Povu Timor nia luta nakonu ho raan,” Nia afirma
Nia hateten, nia mós saúda Joventude Pátriota Timoroan sira hosi organizasaun rezisténsia klandestina oi-oin bá sira-nia eroízmu, aten-barani hodi hasoru atrosidade no hahalok bárbaru sira inimigu nian no partisipa ativu iha luta bá Independénsia.
“Ita bo’ot sira maka eroi no funu-na’in bo’ot sira, tanbá uma-la’ek no laiha fatin atu subar, ho reen-to’os mamuk no foti aas, ita bo’ot sira hasoru kilat-musan inimigu nian iha manifestasaun sira iha Santa-Kruz, iha dalan sira sidade territóriu nian no to’o iha sidade kapitál husi okupante,bá ami hotu nia agradesimentu no reverénsia no bá eroi monu sira onra no glória iha eternidade pátria lalehan nian, ami nia luta la hó papél Igreja Katólika nian ami sei la moris ohin loron, ami orgullu ho Igreja Katólika, tanbá sai ami nia vanguarda no defensór iha rai-inan, sempre ho nia lian profétiku hodi defende Povu hasoru inimigu nia barbaridade no tórtura sira, bá kleru Katóliku Timoroan ne’ebé reprezenta iha-ne’e husi reverendosimu Bispu Dioseze tolu nian no bá Bispu Eméritu Dom Carlos Filipe Ximenes Belo ami dirije ami-nia liafuan agradesimentu kle’an,” Governante ne’e apresia
Deputadu ne’e dehan,durante Papa hosi Sua Santidade Papa João Paulo II – ohin loron santu ida-Santa Sé akompaña besik ona martíriu hosi Povu Timoroan.
“Ami agradese bá diplomasia Pontífika Vatikanu nian liu-hosi Sua Santidade ne’ebé vizita Timor-Leste iha fulan Outubru tinan 1989, hodi loke territóriu okupadu bá koñesimentu mundu Internasionál nian, ohin ita haksolok no orgullu tebes simu fali vizita papa husi Sua Santidade Papa Francisco ne’ebé iha tempu badak sei mai Timor-Leste entre loron 9 to’o 11 fulan Setembru,” Nia relata
Deputadu ne’e afirma,Independénsia Timor-Leste nu’udar istória susesu ida iha istória Nasoins Unidas nian, organizasaun ida ne’ebé eziste hafoin Funu Malirin remata, iha ne’ebé Nasaun sira iha mundu halibur hamutuk hodi espresa sira-nia kompromisiu hodi promove diálogu no konstrusaun dame nian iha polu oi-oin planeta nian.
“To’o ohin loron ita haree ezisténsia funu nian ne’ebé kontinua hanesan funu iha Ukránia, iha Médiu Oriente no ameasa uza arma nukleár sira hosi Nasaun balu ne’ebé iha tendénsia bá destruisaun umanidade nian,ita hatene katak Nasoins Unidas preokupa ho situasaun hirak ne’e no ita nu’udar Nasaun ne’ebé foin moris senti Povu nia terus,ita-nia aniversáriu referendum bá dala-XXV ne’ebé rezúlta hasa’e bandeira iha meia-noite loron 20 fulan-maiu tinan 2002 hahú ita-nia responsabílidade rasik atu moris nu’udar Nasaun, garante ita-nia unidade nu’udar Timoroan no hala’o dezenvólvimentu sira hodi hadi’a Povu nia moris,” dehan Deputadu Kalohan
Governante ne’e subliña, Prezensa ONU nian direitamente hosi SekJer iha selebrasaun ida-ne’e nu’udar razaun ida ne’ebé inspira nia atu hanoin hikas fali liafuan diskursu husi saudozu “Koffi Annan” iha kalan tranzisaun bá loron 20 fulan Maiu tinan 2002, loron Restaurasaun Independénsia ne’ebé nia sita iha ne’e.
“Independence is not an end. It is the beginning of self-rule which requires comprise, discipline, unity and result” Independénsia la’ós rohan ida-ne’e maka inísiu atu organiza ita-nia an, ne’ebé presiza kompromisiu sira, dixiplina, unidade no rezúltadu sira,ami iha nafatin serbisu maka’as atu hala’o, iha loron ida ne’e bainhira ita selebra ita nia referendu, ita hanoin fali Povu Sahara Osidental ne’ebé mós aspira bá sira nia Independénsia liu-husi Bankada Partidu Demokrátiku hato’o nia pedido atu ONU mós halo Referendu bá Povo Sahara atu sira bele fó sira nia lia hodi deside destinu bá sira nia rain, atu ami nia pedidu ne’e fahe hosi reprezentante sira hosi Nasaun sira ne’ebé prezente iha ne’e ne’ebé fahe prinsípiu hanesan kona-bá respeitu bá valór sira direitu umanu nian, solidariédade no dame iha mundu.”Nia hakotu
Jornálista: Esperança Monteiro Soares
Editóra: Delfina Borges
