(Díli) Mudansa– Asosiasaun Ajénsia Viajem no Tour Operador Timor-Leste (AAVOT-TL) halo asaun karidade ba inan Claudia selebra ezistensia AAVOT-TL ba dala I.
“Ami nia asaun karidade ida ne’e ami halo hodi komemora ami nia loron Asosiasaun ne’ebé ami hari nia ezistensia ba tinan ida AAVOT-TL ho nune’e husi ami nia membru tomak ne’ebé iha ajensia Viajen tolu-nulu ami tur hamutuk hodi halo asaun karidade ida,”dehan Indawati Maria dos Santos Jerónimo ba jornalista Media Mudansa iha Tasi-tolu (02/08/24)
Nia akresenta, sira hare katak inan Claudia Prezisa tulun husi ema mesmu ituan tau hamutuk husi membru hotu.
“Ami nia hare inan Claudia presija duni ema hotu nia tulun,tanbà ne’e ami koko tau hamutuk husi membru hotu-hotu, hodi bele ajuda netik inan nia nesesidade kada loron nian maske ituan ida ne’e mak kbiit ami nia,” Nia siubliña
Nia afirma,AAVOT-TL hetan informasaun liu husi públikasaun notisia Media Mudansa nian, kona ba inan Claudia ho difikuldade ne’ebé mak nia hasoru.
“Ami hetan informasaun liu husi imi nia notisia ne’ebe mak imi públika liu husi imi nia Media importante tebes ba inan feto faluk ho nia forsa ne’ebé iha inspira ami mós, tanbà ho difikuldade ne’ebé nia iha ita hatete obstakulu ba moris ne’ebe mak nia iha,inan faluk iha fuan ne’ebé mak bo’ot ami hakarak ajuda husi ami nia Ekipa,” Nia relata
Nia hatutan, sira nia asaun karidade ida ne’e sei kontinua nafatin bá oin liu-liu ba fatin dira ne’ebé mak identifika ona presija tebes tulun.
Ami nia asaun karidade ida ne’e sei kontinua nafatin ba oin, no ami identifika ona, agora dau-dau-daun ema nain rua Mariano Soares iha Bebonuk ami mos sei tun direta ba hare hodi ami ajuda responde bá nesesidade ne’ebe mak iha, ami halo ida ne’e la’os dehan katak ohin ne’e deit, maibé ami nia ekipa sei mai fila fali hodi hare sira depois fulan 4.”Nia hakotu
Jornalista : Inácio Silva
Editóra : Delfina Borges
