(Díli) Mudansa– Asosiasaun Jornalista Timor Lorosa’e (AJTL) Servisu hamutuk ho Oxfam iha Timor-Leste, hodi organiza Média Tour ba jornalista sira hodi promove setór produtivu sira iha Munisípiu Ermera, liu-liu ba iha setór agrikultura, Turízmu, joven kreativu sira, no feto potensial, Program Sesonal Works iha Australia nomós ema ho disifisiénsia no LGBT sira.
Presidente Asosiasaun Jornalista Timor Lorosa’e (AJTL) Zevonia Vieira, hateten, atu informa ba públiku katak ohin loron AJTL servisu hamutuk Oxfam iha Timor-Leste, kontinua halo Média Tour ba jornalista sira hodi ba iha Munisípiu Ermera hodi foti istoria joven sira nian ne’ebé mak kontribui liuhosi setór produtivu sira. Setór produtivu sira maka hanesan, Agrikultura, Turízmu, nomós oinsá mak promove joven sira ne’ebé hala’o servisu iha program Sesonal Works iha Australia.
“Tanba ne’e AJTL kontinua fó espasu ba ita nian membru AJTL sira, hodi ba halo kobertura iha area rural sira, ho nune’e bele hetan informasaun sira ne’ebé presiza, estadu ho governu sira hare’e no tau atensaun,” Dehan Presidente AJTL Zevonia Vieira, liuhosi komferénsia Imprensa iha Edifisiu Oxfam Hudi-laran, Kinta 18/04/2024
Nune’e mós, Reprezentante Country Director Oxfam iha Timor-Leste, Adilson Junior mós hateten, AJTL kontinua iha nian komitmentu hodi servisu hamutuk ho Oxfam iha Timor-Leste, hodi hala’o Média Tour. Oxfam ho AJTL la’os foin halo Média Tour, maibé Média Tour ida ne’e halo iha tinan ida liu ba ona, hodi kontinua halo kobertura ba joven sira ne’ebé kreativu iha Munisípiu sira.
Nia haktuir programa Média Tour ida ne’e hetan finasia husi Deparment Of Foreign Affairs and Trude (DFAT), liuhusi projeitu prosivu. Ho Objetivu atu lori Jornalista sira ba iha Munisípiu Ermera, hodi halo kobertura kona-ba joven sira nia kreatividade, liga ho sira nia investimentu iha setór Agrikultura. Alende ne’e, iha mós joven sira ne’ebé maka hetan oprtunidade ba iha programa Sesional Works, halo mós kobertura ba sira nian susesu, no saida maka sira aprende kona-ba iha Programa Sesional Works ne’e rasik no saida mak sira kontribui iha sira nian hela fatin no iha komunidade.
Nia salienta, entaun ida ne’e importante tebes atu kontinua halo investigasaun ne’ebé klean, no bele informa ba polítiku nain sira, liu-liu ba governu sira ne’ebé maka foti desizaun, atu bele hare’e kona-ba potensia hirak ne’ebé joven sira iha area rural iha Munisípiu Ermera. Nomós saida mak Governu nia planu atu kontribui atu investe hodi hadia no dezenvolve di’ak liu tan sira nia investimentu ne’ebé maka durante ne’e sira halo iha area rural.
“Molok Média Tour ida ne’e ita organiza, ita halo uluk Worshop iha loron rua no lori ema sira husi SEFOPE mai esplika kona-ba informasaun sira ne’ebé maka liga ho empregu externa, joven hira maka envolve iha empregu ida ne’e. Alende ne’e ita mós konvida sosiedade sívil hanesan La’o Hamutuk atu fahe informasaun sira liga ho orsamentu jeral estadu nian ne’ebé mak aloka ba iha setór Agrikultura no setór produtivu sira seluk,”nia esplika.
Nia haktuir tan katak, informasaun hirak ne’e sai hanesan bukae ida ba kolega jornalista sira hotu-hotu, molok sira tun ba iha kampu hodi halo kobertura, atu bele haklean liu tan no komfirma saida maka akontese iha Munisípiu Ermera. Iha kobertura ida ne’e maluk jornalista sira sei ba foti informasaun husi joven sira, grupu feto no inklui ema ho defisiénsia sira, nune’e mós autoriedade lokal sira atu bele komfirma mós informasaun sira ne’e mak jornalista sira foti ne’e bele iha balansu. Nune’e mós informasaun hirak ne’e bele tulun mós polítiku nain sira, hodi kontinua sira nia investimentu no prioridade sira iha setór Agrikultura no iha setór sira seluk. hodi bele diversifika ekonomia iha nasaun.
“Entaun ha’u hanoin ida ne’e maka objetivu no servisu komperasaun ita halo entre Oxfam ho AJTL, no ita espera katak Média Tour ne’ebé maka sei hala’o iha Ermera loron tolu ne’e sei la’o ho susesu, no kolega jornalista sira bele hetan informasaun sira ho diak no ita bele kontinua halo advokasia iha nível Munisípiu nomós nível nasionál,”Tenik nia.
Alende ne’e, husi rezultadu Média Tour ne’e mak AJTL sei produs istória susesu joven sira nian, inklui feto potensial no ema ho defisiénsia, grupu joven kreativu sira seluk, no istória sususu ida ne’e sei halo ba produsaun ba buletin Média Tour nian, no Média Tour ida ne’e sei halo lansamentu hodi konvida Ministériu sira ne’ebé relevante atu halo diskusaun kona-ba saida mak jornalista sira hetan iha kampu durante hala’o Média Tour.
Programa Média Tour ne’e hetan apoiu fundus husi DFAT ka Governu Australia, liuhosi projetu prosivu no kolabora entre Oxfam iha Timor-Leste nomós AJTL.
Jornalista : Sandi Belo
Editór. : Veraka