(Dili) Mudansa – Vise Primeiru Ministru (VPM), Ministru Koordenador Asuntus Sosiais no Ministru Dezenvolvimentu Rural no Abitasaun Komunitária, Mariano Sabino Lopes hamutuk ho Embaixada Estadus Unidus Amérika, reprezenta husi Diretór Interinu Misaun USAID, Mark Anthony White lansa plataforma e-learning ba organizasaun Sosiedade Sivíl sira iha Timor-Leste.
“Lansamentu aprendizajem para bele halo koordenasaun, mobilizasaun, avaliasaun ba relasaun ho mós halo advokasia koletiva ida ho di’ak liu, ha’u hanoin tempu ona atu ita dijitaliza buat sira ne’e hodi ita bele komunikasaun di’ak, aban bairua karik bele dijitaliza informasaun sira ne’ebé importante no Jornalista sira mós bele asesu informasaun sira,” Vise Primeiru Ministru (VPM), Ministru Koordenador Asuntus Sosiais no Ministru Dezenvolvimentu Rural no Abitasaun Komunitária, Mariano Sabino Lopes dehan hafoin remata eventu lansamentu ne’e iha Otel Timor, Segunda, 22/01/2024.
Ne’ebé apresia Sosiedade Sivíl iha papel importante iha estadu Direitu Demokrátiku Timor-Leste, nune’e nu’udar Vise PM hakarak salut ba sira atu sira bele kontinua ho serbisu sira ne’ebé maka hala’o hela, ho ida ne’e apelu ba sira hotu-hotu atu bele hala’o papel serbisu ne’ebé importante, halo nafatin kritika, auto-kritika no kontrolu.
“Tanba ita uza povu nia osan ba iha kraik, ita iha atividade barak ne’ebé iha povu nia leet, tanba ne’e maka ita tenke kontrola hodi benefisiu ne’e tenke ba duni povu ho mós programa hotu-hotu tenke di’ak to’o iha kraik,” VPM Asanami dehan.
Ne’ebé organizasaun Sosiedade Sivíl sira ne’ebé sai espesifiku ba setoral sira ne’e, entaun fó atensaun ba setoral sira atu nune’e setoral sira ne’e to’o iha kraik no hotu-hotu hakarak tuir komitmentu Primeiru Ministru (PM) nian katak, serbisu ho kualidade no mós prestasaun serbisu ne’ebé maka ba povu tomak.
Reprezenta husi Diretór Interinu Misaun USAID, Mark Anthony White haktuir, kontente teb-tebes ba hotu-hotu ohin marka prezensa iha ne’e atu sai sasin ba okaziaun istóriku ida ne’e kona-ba lansamentu FONGTIL nia plataforma aprendizajem e-learning.
Espasu sentralizadu no interativu ne’e fó kbiit ba FONGTIL, organizasaun ne’ebé mak halibur ONG 270, inklui Rede ba Saúde Timor-Leste (REBAS-TL) ho membru 13.
FONGTIL mak sei tau matan ba plataforma ne’e ho apoiu tékniku no finanseiru hosi Governu Estadus Unidus Amérika, sentru aprendizajen online foun ne’ebé mak foin lansa ne’e dezeña ho estratejia atu hametin interkambiu informasaun, koordenasaun, kapasitasaun no advokasia entre ONG sira.
Plataforma ne’e oferese konteúdu e-learning kona-ba tópiku sira hanesan jestaun finanseira, crowdsourcing, interkambiu informasaun, peskiza no instrumentu advokasia. Nia mós fasilita dizeminasaun informasaun, optimiza alokasaun rekursu, jere kalendáriu no eventu sira, no enkoraja oportunidade ba parseria, estratéjia atu fahe informasaun, no kolaborasaun.
“Liu husi lansamentu ba inisiativa transformativu ida ne’e, Estadus Unidus afirma fila-fali ninia kompromisu ba Timor-Leste nia dezenvolvimentu,” Diretur Interinu Misaun USAID, Mark Anthony White hateten.
Lansamentu plataforma e-learning ne’e aliña ho USAID nia atividade ba sustentabilidade sistema saúde hodi apoia involvimentu síviku no advokasia hodi haforsa sistema saúde no USAID ou Timor-Leste nia atividade ONG advokasia ba Governasaun di’ak hodi fó apoiu esensiál ba kria ambiente ida ne’ebé di’ak hodi fasilita ONG sira no hasa’e sira nia kapasidade atu fornese serbisu advokasia ne’ebé bazeia ba evidénsia no sustentavel ne’ebé reprezenta lian sidaudaun sira nian.
“Hodi Organizasaun Sosiedade Sivíl Timor-Leste nian naran, ha’u hato’o ha’u-nia sinseru agradesimentu ba Governu Estadus Unidus tanba apoiu tékniku no finanseiru ne’ebé boot tebes ba lansamentu plataforma e-learning FONGTIL nian ne’e,” Diretor Ezekutivu FONGTIL Valentim da Costa Pinto hateten.
Liu husi USAID, misaun EUA ba Timor-Leste kontribui ona besik millaun $92 entre tinan 2021 no tinan 2025, hodi hametin Ekonómia Timor-Leste nian no promove governasaun di’ak.
Dezde Timor-Leste nia independénsia, USAID kontribui ona millaun $323 resin, hodi pro dezenvolvimentu inkluzivu no pasífiku ba Timor-Leste ida-ne’ebé prosperu, saudavel no auto-sufisiente.
Jornalista: Mariano Do Santos Abi
Editor: Felisberto F. Da Costa
