(Dili) Mudansa – Ministeriu Juventude Desportu, Arte no Kultura (MJDK) liu husi Presidente Komisaun Reguladora Arte Marsiais (KRAM) Octavio da Conceição informa, nia parte sente triste (Estres “S3”) tanba lider husi Organizasaun Arte Marsiais rua la marka prezensa iha sorumutu ne’ebé atu ko’alia kona-ba refiskalizasaun OAM, tanba tuir planu fiskalizasaun hahú aban iha munisípiu Dili.
Espesifikamente iha munisípiu Dili, sentru eskola no klubu sira ne’ebé prátika arte marsiais hamutuk 100 resin kompostu husi PSHT (96), IKS (70) no KORK (28) ne’e mak sei fiskalisaun hahú aban.
Octavio konta, rezolusaun governu Nu. 45/2023 10 Novembru, ne’ebé suspende atividade treinamentu organizasaun arte marsiais iha Timor Leste maibé iha rezolusaun ida ne’e mós fó orden ba KRAM no Komando PNTL atu halo refiskalizasaun ba organizasaun ne’ebé prátika arte marsiais iha Timor.
Nia deklara, KRAM konvida organizasaun arte marsiais PSHT, KORK no IKS-PTL, infelizmente lider rua KORK no PSHT la mai, maibé KRAM tenta nafatin oinsá bele hasoru malu ho sira hodi informa atividade refiskalizasaun ba sira nia treinadór.
“Nudar Presidenti KRAM sente triste tanba lider arte marsiais sira atu hasoru malu maibé lider KORK no PSHT la konsege mai, hanesan governu kontinua komunika ho sira tanba atividade aban refiskalizasaun tuir kalendáriu sei hahú husi postu administrativu Metinaro no Cristo Rei munisípiu Dili,” Dehan Prezidente KRAM ba jornalista iha Dili, sesta, 19/01/2024.
Nia afirma, KRAM hamutuk ho komando Geral PNTL, komandu Munisipiu Dili, komandu postu administrativu sira no mós OPS sei halo refiskalizasaun iha munisípiu Dili durante semana ida.
“Resolusaun fó loron 90, ami sei entrega relatóriu refiskalizasaun iha 10 Fevereiru 2024 ba MJDAK no Ministeriu Interior hodi aprezenta ami nia relatóriu no rekomendasaun sira, antes aprezenta ba Konsellu Ministru hodi hetan avaliasaun no desizaun ikus iha KM,” Prezidente ne’e esplika.
Nia konta, Resolusaun governu Nu. 45/2023 10 Novembru ne’e orienta KRAM atu refiskalisaun ba sentru formasaun sira ho objetivu atu Indetifika se mak responsavel ba klubu, sentru formasaun no eskola sira, treinadór, atleta Feto no mane hira, na’in ba rai, fatin treinamentu.
Rai ne’e nia luan ne’e hira? Asesu ba estrada ga lae? Fatin ne’e nakloke ba ema hotu hare ga lae? Ga subar de’it, iha autorizasaun ruma ga lae hanesan autoridade lokál no xefe suku, xefe aldeia sira no ida hirak ne’e mak KRAM sei haree.
Depois rezolusaun governu Nu. 45/2023 10 Novembru remata iha loron 10 abríl mak reativa fila atividade prátika arte marsiais mak KRAM foti sansaun rigorozu ba membru organizasaun hotu hotu ne’ebé la kumpre lei 5/2017 no la kumpre 2/diretiva/KRAM ne’e sei fó sansaun todan ba sira.
Kuandu governu reativa sei aplika mós dekretu lei kontrola ordenasaun hodi hetan sansaun, se hatais farda lao iha públiku Polísia kaer kona sei hetan multa $50 to’o $200, halo publikasaun iha média Facebook no online seluk mak kaer tomak nia ID, sei hetan sansaun, KRAM komprimidu iha mandatu ida ne’e mak Membru OAM la iha responsavel ba nia an automatikamente nia hetan sansaun.
“KRAM aproveita oportunidade ida ne’e apela ba membru organizasaun arte marsiais katak atitude individuál ne’ebé la respeitu sira nia estatutu ka rejimentu organizasaun no piór liu tan la kumpre rezolusaun governu nian signifika falta disiplina ami sei hare hotu ida ne’e,” nia salienta.
Jornalista : Jaime Ornai
Editór : Orlando Magno
