(Dili) Mudansa – Projetu konstrusaun edifisiu Sentrál Rádiu Televizaun Timor-Leste. Empreza Públika (RTTL.EP) sei hahú iha tinan 2024 no remata iha tinan 2026 hetan apoiu husi Governu Japaun ho montante 5.9 Milhões.
Tuir Sekretáriu Estadu Komunikasaun Sosiál (SEKomS), Expedito Dias Ximenes hatete, ohin Embaixadór Japaun, Kimura Tetsuya, mai halo enkontru ho SEKomS no Prezidente RTTL hanesan fó hatene kopreparasaun konstrusaun edifisiu sentral RTTL nian iha kaikoli.
“Hanesan imi hotu hatene katak, Governu Japaun apoiu liu husi nia ajudu ho 5.9 Milhões mai iha Governu Timor-leste, ne’ebé fó apoiu ba konstrusaun edifisiu sentrál RTTL ne’ebé sei hahú iha tinan 2024 no sei remata iha tinan 2026,” SEKomS Expedito dehan ba Jornalista sira hafoin remata enkontru ho Embaixadór Japaun Kimura iha Gabinete SEKomS, Tersa 23/01/2024.
SEKomS Expedito haktuir, iha orsamentu kuaze rihun 6 ne’e aliende konstrusaun edifisiu Sentrál mós iha osan balu iha rihun 6 ne’e ba mós formasaun jornalista sira iha RTTL nian no Embaixadór Kimura mós fó hatene ba iha Governu katak, preparativu konstrusaun prontu ona, agora hein de’it bainhira konstrusaun edifisiu multi-funsaun besik atu hotu ona iha kaikoli.
Expedito informa, bainhira estudu multi-funsaun iha kaikoli ne’e remata maka edifisiu rua ne’ebé iha kaikoli ne’e, sira sei halo rahun tiha depois halo konstrusaun edifisiu foun RTTL nian ne’ebé hetan apoiu husi Governu Japaun.
Iha enkontru ne’e mós parte SEKomS ho Prezidente RTTL husu Governu Japaun liu-liu ba projetu kompañia ou empreza atu hala’o konstrusaun ne’e, tanba ema hotu-hotu hatene orsamentu Governu Japaun nian, maibé entrega ba iha UNDP hodi bele halo prosesu tenderizasaun no prosesu ne’e la’o daudaun husi UNDP hotu-hotu hein katak, tinan ida ne’e hahú halo konstrusaun.
“Bainhira edifisiu sentrál hotu, iha formasaun espesiál ba jornalista sira iha RTTL ne’e ami husu atu fokus liu ba iha formasaun ho karakter investigativu tuir Primeiru Ministru nia pedidu iha momentu seremonia iha loron 12 fulan Janeiru tinan 2024 katak, jornalista sira la’ós de’it atu halo notisia maibé sei presiza halo notisia ne’ebé kle’an,” Expedito esplika.
Expedito argumenta, RTTL hanesan estadu nian, maka presiza halo notisia tenke kle’an ho dadus nakonu ho faktu, bainhira halo notisia, tanba ne’e maka iha formasaun ne’ebé maka sei halo durante prosesu konstrusaun edifisiu sentrál RTTL nian sei iha formasaun foka liu ba karakter investigativu.
Ne’ebé tuir nia (Expedito) hanoin kolega sira iha RTTL bainhira tinan 2026 hetan ona edifisiu foun, tanba ema hotu-hotu hatene agora ne’e edifisiu uluk kedas no bainhira iha situasaun udan RTTL sempre hasoru inundasaun, ne’e prezudika serbisu loron-loron nian ba iha profesionais RTTL nian ida ne’e maka ohin Embaixadór Japaun Kimura mai hasoru SEKomS ho RTTL.
Kona-ba preparativu ne’e maka sira nia ekipa tekníku ba haree ona fatin prosesu konkursu ka tenderizasaun UNDP halo daudaun ona no iha mós kompañia ne’ebé halo hanesan baibain bolu estudu viabilidade iha fatin Kaikoli nian ne’e la’o hela, halo tiha ona no bolu dehan aprovasaun ba projetu ne’e halo ona.
“Ha’u reprezenta Governu liu husi SEKomS depois aprejentasaun kontratu ne’e ami konkorda ona tuir projetu aprejentasaun husi kompañia ne’ebé halo estudu viabilidade ne’e,” Expidito dehan.
Antes nia hakotu afirma katak, kona-ba kompañia atu hetan ne’e seidauk, maibé agora ida halo ne’e ekipa tekníku ida maka halo hanesan estudu viabilidade atu haree rai ne’e oinsá, fatin oinsá depois haree prosesu tenderizasaun la’o ne’e, sira iha ideas kona-ba oinsá atu halo konstrusaun ne’e iha rai ne’ebé nakonu ho bee iha okos, nune’e maka sei loke tenderizasaun internasionál, tanba ne’e apoiu husi Governu Japaun ho osan ne’ebé boot konserteza sira sei loke tanba ne’e maka fó ba UNDP hodi halo prosesu administrasaun ida ne’e.
Jornalista: Mariano Do Santos Abi
Editor: Felisberto F. Da Costa