(Dili) Mudansa –Tuir Sekretáriu Estadu Komunikasaun Sosiál (SEKomS), Expedito Dias Ximenes hatete, liga ho iha fulan rua liu ba, iha enkontru joven potensiais sira hamutuk atus 2 resin, ne’ebé halo semináriu iha Xanana Sport Center no nia (Expedito) ba fó palestra ou esplikasaun polítika Nonu Governu nian iha área komunikasaun sosiál.
SEKomS Expedito subliña, iha joven sira ne’e nia oin, nia esplika katak polítika Nonu Governu nian iha área komunikasaun sosiál no mosu pergunta husi joven sira katak, bele ka lae, Nonu Governu halo esforsu atu oinsá reprezentasaun “cabang YouTube” ne’e bele kria iha Timor-Leste, joven sira maka husu dehan bele ka lae Nonu Governu halo esforsu ida ne’e.
“Ha’u iha momentu ne’e, prosesu ne’e la’ós difisil maibé prosesu ne’e presiza tempu no hahú iha tempu ne’ebá kedas, ha’u hamutuk ho Ministeriu kompetente hanesan Minísteriu Tele Komunikasaun (MTK) ho Ajénsia Teknolojia Informasaun no Komunikasaun (TIC TIMOR I.P sigla portugues) ho mós Konsellu Implementa (KI) ho RTTL, ami buka halo korespondensia YouTube iha nasaun Singapura, Jakarta ho Inglatera,” Expedito informa ba Jornalista sira hafoin remata enkontru ho Embaixadór Japaun Kimura iha Gabinete SEKomS, Tersa 23/01/2024.
Expedito salienta, ne’ebé korespondensia la’o hela, tanba Nonu Governu sempre hatete katak, bainhira reprezentasaun “caban YouTube” iha Timor-Leste sei ajuda bele hetan hanesan transfere sira nia matenek, sira nia kreatividade, tanba joven barak iha talentu di’ak, joven barak sai YouTuber ne’ebé di’ak, entaun bainhira iha nia caban ou reprezentasaun YouTube iha Timor-Leste maka joven sira ne’e bele hetan hanesan produtu ne’ebé maka sira halo liu husi sira nia pájina ho matenek sira iha ne’e, bele hetan netik buat balu hodi ajuda sira atu sai kreativu di’ak liu tan.
“Tanba ita hotu-hotu hatene durante ne’e ita seidauk iha reprezentasaun caban YouTube iha Timor-Leste, entaun sira ne’ebé sai YouTuber Member ne’e tenke ba rejistu iha nasaun sira seluk hanesan Indonézia, ida ne’e ladún iha vantajen ba iha Joven sira, tanba ne’e maka esforsu hela SEKOMS hamutuk MTK liuliu TIC halo hela esforsu oinsá iha loron ruma, bele reprezentasaun YouTube ne’e hodi loron ruma bele iha Timor-Leste para bele ajuda joven kreativu sira ho talentu di’ak no bele ajuda sira atu sira sai kreativu liu tan no bele hetan netik reseita ki’ikoan ruma ba sira,” nia hakotu.
Jornalista: Mariano Do Santos Abi
Editor : Felisberto F. Da Costa
