(Dili) Mudansa – Minísteriu Interior, planu sei monta tan postu Unidade Patrullamentu Fronteira (UPF) iha Noel Ekat ne’ebé lokaliza iha Sub-rejiaun Oesilo, Rejiaun Administrativu Espesiál Oekusi Ambenu (RAEOA).
Asuntu ne’e hato’o husi Ministru Interior (MI), Fransisco da Costa Guterres hatete, dehan iha Palásiu Governu salaun auditoriu-PCM, ne’ebé MI priénse programa Meet The Press organiza husi Sekretáriu Estadu Komunikasaun Sosiál (SEKOMS), bainhira iha sesaun pergunta, Sesta 10/11/2023.
Ministru Interior (MI), Fransisco da Costa Guterres informa, objetivu atu monta tan postu ida iha Noel Ekat oinsá atu halo prevensaun ba merkadoria ne’ebé hatama sasán ilegál, tanba iha postu ida ba postu seluk distánsia dook.
Nia subliña, área sira ne’ebé iha Mahata mamuk hela, tanba iha ne’ebá maioria mota mak hafahe fronteira No parte seguransa sira balu dehan labele identifika katak, ema ne’e Indonézia ka Timor-Leste nian?
“Ita sei monta tan postu Noel Ekat ne’e atu monta tan postu ida hodi haree fali, tanba susar atu kontrola, karau ne’e kesi hela iha mota ibun ne’e la hatene sé nian maka ne’e, tanba nia hamriik halo movimentu ba mai dala ruma tama ita-nia rai no Indonézia nia rai,” nia realsa
Nia dehan tan katak, distánsia ne’e importante tebetebes tanba iha fatin balu sira tenke la’o dook duni, hanesan iha RAEOA Postu Cruz UPF iha Sub-rejiaun Passabe, ida ne’e tenke la’o duni, tanba iha área sira iha kruzamentu ne’e barak.
“Iha Oekusi ne’e, ita bele dehan tenke halo kontrolu maka’as liu tan dala ruma mota maka fahe, ha’u atu dehan iha área Cruz UPF Passabe nian, sira tenke la’o tun ba kraik hodi halo kontrolu, portantu iha ne’ebá asesu estrada mós la iha,” nia afirma.
Enkuantu kona-ba estrada ne’e durante loron 15 ne’ebé ami hale’u tiha ona no ko’alia ona ho Minísteriu Obras Públiku (MOP), sira mós prepara hela, nune’e ami preparadu hela levantamentu dadus no preparadu hela atu hatama hela ba MOP, hodi loke estrada ba Postu ida ba Postu ida.
“Ho ida ne’e maka ami tenta atu monta hela postu balu kuaze postu 7 hanesan para aselera buat sira ne’e hotu,” nia hakotu.
Jornalista : Mariano Do Santos Abi
Editór : Orlando Magno