MI Prosesa Hela Estatutu Atu Dignifika Membru Polisia Reformadu Na’in 158

banner 120x600

(Dili) Mudansa – Minísteriu Interior (MI) kestaun ba membru polísia reformadu na’in-158 iha VIII Governu konstitusionál nia mandatu ne’e faillansu iha pre-aprejentasaun reforma nian tanba ne’e MI prosesa hela estatutu hodi dignifika sira nia direitu.

Ministru Interior (MI), Fransisco da Costa Guterres informa, ema hotu-hotu hatene no nia (Fransisco) mós ko’alia dala barak iha média, maibé prosesu legalmente to’o iha públikasaun, despaixu Komandante Jerál nian ne’e la falla maibé falla iha pre-aprezantasaun.

“Prosesu atu hatama ema iha pre-aprejentasaun reforma ne’e falla, tanba estatutu PNTL rasik la define klaru kona-ba prosesu reforma, publikasaun lista ne’ebé PNTL halo liu husi Komandante Jerál ne’e loos no hatudu ema sira iha prosesu pre-aprejentasaun,” nia dehan ba jornalista iha Palásiu Governu Sesta 10/11/2023.

Nia esplika, iha prosesu ne’e maka koasaun ou viola tiha ema nia diretu, obriga ema atu asina buat ida ne’ebé nia lakohi, kontra vontade rasik, maibé iha karta ne’e hakerek katak, “ha’u hakarak voluntariamente, ha’u hakarak sai” mais ema lakohi ne’e, konsekuénsia.

Iha deklarasaun no hakerek katak, voluntariamente hakarak sai, ida ne’e MI atu buka ratifika fallansu ne’e, entaun komu mekanizmu ne’e la la’o, entaun bele uza de’it koñesimentu legalidade no bolu fali ema sira ne’e.

Ministru Fransisco haktuir, MI tenke ratifika tiha prosesu, ne’e liu husi tetu razaun bazeia ba sira nia problema, katak sira kontinua kria pre-aprezentasaun depois reativa fila fali iha prosesu pre-aprejentasaun, nune’e Governu prepara kondisaun ho mekanizmu atu membru sira ne’e reforma.

“Ami prepara hela estatutu, atu sira hatama mekanizmu oinsá ema sira ne’e bele reforma, da ne’e maka ita halo ou kria mekanizmu ida ne’e,” afirma Ministru Fransisco.

Nia subliña, MI reativa sira iha pre-aprejentasaun, depois husi ne’e ministériu Interior prepara tan kondisaun ba sira, iha kondisaun primeiru, haree ba sira nia serbisu, tanba balu serbisu tinan 20 no balu serbisu kleur tiha ona, balu veteranu serbisu kleur.

Ida ne’e, tenke haree katak ema ne’ebé kontribui ba instituisaun, fó ninia an tomak ba instituisaun hodi serbí instituisaun, atu ajuda ou rezolve problema povu nian, entaun Governu mós tenke onra ema sira ne’e liu husi prosesu mekanizmu.

“Primeiru mekanizmu maka ita onra tiha liu husi halo promosaun ba sira promove sira molok sira sai, Ida fali sira atu sai ona, tenke halo enkontru, haklalak de’it katak, ami tama husi odamatan ikus imi kaer ami sai husi janela de’it, ami serbí, dedika ami nia an ba rai ida ne’e, tan de’it estadu, maibé imi foti fali ami sai de’it husi janela,” nia hakotu.

 

Jornalista : Mariano Do Santos Abi

Editór       : Orlando Magno

banner 325x300