(Dili) Mudansa – Timor-Leste fiar katak, delimitasaun definitiva no permanente fronteira ho nasaun Indonésia sei salva guarda soberania nasionál, hametin seguransa, garante abilidade sosio-kultural no sei lori benefísiu sósiu-ekonómiku entre nasaun Indonesia ho Timor-Leste.
Tanba ne’e Ministeriu Interior atu halo kontrolu ba fronteira iha Timor-Leste ho efetivu, tan ne’e ministériu Interior tau prioridade durante Nonu Governu konstitusionál nia mandatu hodi asegura situasaun no kondisaun iha Fronteira.
“Ami tau prioridade ba fronteira sira, oinsá tau mekanizmu, hodi bele halo kontrolu iha fronteira ho efetivu, tanba ne’e maka durante fulan 2 ha’u perkore postu fronteira 49 iha ai laran,” dehan Ministru Interior (MI), Fransisco da Costa Guterres ba jornalista iha salaun auditoriu-PCM, bainhira prienxe programa Meet The Press ne’ebé organiza husi SEKOMS, Sesta 10/11/2023.
Nia afirma, sei tuur de’it iha fatin maka ko’alia no sente dehan natoon ona ba seguransa sira, maibé postu balu ema na’in-3 de’it, balu izoladu liu, uma ne’ebé maka uluk 2007 halo ne’e nakfera tiha ona, hariis fatin la iha, bee moos la iha, eletrisidade la iha tan susar ba seguransa sira iha Fronteira.
Imajina sira na’in-3 de’it iha ne’ebá hela rai dook, postu ida ba postu ida ho kilu metru 4 ou 5, fatin balu asesu ho karreta ne’e arraska. Tanba ne’e maka Fransisco da Costa Guterres to’o iha fronteira sira, hodi haree sira nia situasaun, fatin ida ba fatin ida dook bee moos mós la iha.
“Ida ne’e maka sai hanesan prioridade ida ne’ebé ami tau dezeñu atu haree no prepara kondisaun ba sira, nune’e ita-nia seguransa sira bele halo serbisu ho di’ak tanba, iha Komandu mós destaka tan ona membru 39 ba iha Munisípiu sira hodi reforsa tan kontrolu fronteira,” nia hakotu.
Jornalista : Mariano Do Santos Abi
Editór : Orlando Magno
