(Dili) Mudansa – Sekretariu Estadu Kooperativa (SEKoop) Elizário Ferreira gava Komisaun D ne’ebé trata asuntu Dezenvolvimentu no Ekonómia Sosiál iha Parlamentu Nasionál (PN) tanba konsege inisia ona Projetu Lei ne’ebé sei sai baze ba Ekonómia Sosiál iha Timor-Leste.
“Parte SEKOOP apresia no agradese tebetebes ba deputadu sira, projetu lei ida ne’e inisiativa ne’ebé di’ak,”dehan SEKOOP Elizário ba jornalista iha PN, kuarta, 15/02/2023.
Elizario mós haree katak, lei baze ba ekonomia sosiál ne’e importante tebes tanba Timor-Leste restaura ninia independénsia besik tinan 21 ona, maibé ekonomia sosiál nafatin desorganizadu.
Tanba ne’e, nia dehan, deputadu sira-nia inisiativa -ne’e mós di’ak, tanba bele hasa’e prinsípiu sira oinsá mak asosiasaun Kooperativa, Autorista ou asosiasaun sira hotu bele hatene organiza an, atu bele partisipa direita iha dezenvolvimentu ekonomia sosiál.
Tuir nia, iha konstrusaun ba konstituisaun Repúblika liuliu artigu 138 mós ko’alia kona-ba organizasaun ekonómiku ne’ebé hatete ekonomia hatuur iha konjugasaun forma tolu mak hanesan, setór públiku, setór privadu ho setór kooperativa no sosiál.
“Lei ne’e iha nia fatin atu hetan aprovasaun iha Parlamentu, no agradese ba komisaun D sira-nia inisiativa ida ne’e,”nia salienta.
Nia mós haktuir, diskusaun ba projetu lei ne’ebé halo iha Komisaun D ne’e, parte SEKOOP mai atu fó apresiasaun de’it, no mós kontribui hanoin balun, iha área redasaun nian, bainhira lei ne’e hetan ona aprovasaun iha PN.
Prezidente Komisaun D, António Bianco hatete, projetu lei baze ekonomia sosiál ne’e kria husi deputadu sira iha Komisaun D, tanba durante ne’e seidauk iha lei refere.
“Prontu hanesan saida mak SEKOOP hato’o ona ideia sira, mais projetu lei ne’e, iha Komisaun D, Komisaun D ne’e partidu sira iha laran hotu, mak halo projetu lei ne’e,”afirma nia.
Nia mós informa, husi prosesu lejizlativa ida-ne’e klaru katak seidauk iha koordenasaun másimu ho governu, maibé tanba haree ba lei baze ekonomia sosiál ne’e mós importante, entaun momentu ne’ebá deputadu sira koko buka halo konsensu iha Komisaun D hodi aprova projetu lei ne’e depois mak foin konvida membru governu ne’ebé ke iha relasaun ho asuntu ne’e.
“Membru governu ne’ebé iha relasaun ho asuntu ne’e maka sekretaria estadu kooperativa, no mós Ministériu Finansa, para sira fó sira-nia hanoin kona-ba projetu lei refere,”nia dehan.
Portantu, projetu lei Baze Ekonómia Sosiál ne’e, kompostu husi artigu hamutuk sanulu-resin-haat (14).
Jornalista : Julião da Silva
Editór : Orlando Magno
