(DILI) Mudansa – Prezidente Confederasaun Desportu Timor Leste (CDTL), hamutuk Komisaun Preparasaun Integradu observasaun direita preparasaun Atleta Nasional husi Federasaun Atletismu Timor Leste, ne’ebé mak sei partisipa SEA Games iha Cambodia tinan ne’e.
Prezidente CDTL informa, Macario Sanches katak, Confederasaun desportu Timor Leste hahú vizita ba modalidade sira hotu ohin dadeer-saan mai akompaña preparasaun atletizmu nian.
“Objetivu husi vizita ne’e atu hare kondisaun reál atleta nian no sira nia kapasidade tékniku tanba agora dadaun ninia treinadór sira uza hela programa no kalendáriu treinamentu atu bele sukat husi inísiu to’o fim de preparasaun ba kualidade konforme ita akompaña progresu ne’e la’o,” tenik nia ba jornalista sira iha CDTL, Dili, sesta Feira 24/02/2023.
Macario afirma, fiar katak bele rekolla rezultadu di’ak iha eventu SEA Games iha Cambodia, maibé husu nafatin ba treinadór sira atu bele kontinua reforsa kualidade nune’e bele fó apresiasaun di’ak ba Timor Leste.
“Fulan fevereiru ita fó hela montante balu ba federasaun nune’e sira bele utiliza hodi prepara atleta maibé apartir husi fulan marsu to’o abríl fiar katak ita iha kondisaun di’ak,” katak nia.
Prezidente ne’e esplika, iha pontu rua Importante husi CDTL halo diskusaun ho governu através husi SEJD ho CNTL tau hela esperansa boot ba iha atletizmu mínimu mantein prestasaun ne’ebé hetan iha vietnám, maibé ezije ba Atletismu atu bele presta liu fali buat ne’ebé mak hetan ona husi Atleta Felisberto de Deus.
Iha fatin hanesan Prezidente FATL, Afraino Xavier Amaral argumenta, ninia atleta sira prepara dezde inísiu, agora ne’e hahú ona tama konsentrasaun tanba ne’e fó esperansa no konfiansa nafatin katak sira bele hatudu prestasaun di’ak.
“Kalendariu husi ekipa nasionál ba SEA Games ne’ebé lidera prezidente CDTL ho nia ekipa tomak atu observa ba federasaun atletizmu ne’ebé durante ne’e halo preparasaun komesa husi janeiru mai to agora nune’e sira hare progresu kona-ba preparasaun atleta modalidade atletizmu ne’ebé sei partisipa iha jogus sudeste Asiatiku,” Afriano salienta.
Jornalista : Esperança Monteiro Soares
Editor : Orlando Magno