(Dili) Mudansa – Vise Prezidente Parlamentu Nasionál (PN) Luís Roberto da Silva ezije ba setór justisa atu labele abandona eis Ministru Interiór (MI) Longuinhos Monteiro ne’ebé komete aktu subar arma brankas (kilat) iha ninia rezidénsia.
“Ne’ebé nu’udar membru PN ezije ba ita-nia setór justisa labele haree dehan katak ne’e eis-Prokuradór Jerál Repúblika, eis- komandu jerál, eis-Ministru Interior ne’ebé ita husik de’it entaun ida-ne’e mak orsida ita dehan katak injustisa ne’e mosu iha Timor-Leste,”dehan Luís Roberto ba jornalista iha Parlamentu Nasionál, kinta 19/01/2023.
Nia afirma maski Longuinhos Monteiro nu’udar eis Komandante Jerál PNTL, maibé haree ba estatutu PNTL, la autoriza atu eis Komandu Jeral rai armas iha ninia rejidensia, tanba fatin atu rai armas nian ne’e iha.
Tanba ne’e, nu’udar vise Prezidente PN husu nafatin ba tribunál, atu prosesu nafatin Longuinhos Monteiro hodi hatudu ba públiku katak setór judisiáriu halo duni tratamentu ba ema hotu-hotu hodi kumpre ba lei no la kria injustisa.
Nia mós husu PSIK atu halo detensaun ruma presiza hetan mandadu ruma tanba se PSIK halo detensaun bazeia ba lei, no ba tribunal hatete ne’e detensaun ilegál, ne’e públiku mós tenke buka hatene ona tanba bazeia ba iha lei prosesu penál ne’e Ministériu Públiku mak na’in ba prosesu hotu-hotu.
” Entaun bainhira atu halo detensaun ba sidadaun sé de’it mak komete krime tenke iha mandadu kapturasaun husi MP,”hatete nia.
Enkuantu, iha loron 18/1/2023, Tribunal Distrital Dili deside liberta Eis Ministru Interior Longuinhos Monteiro tanba asaun buska no aprensaun husi Polísia Sientífika no Investigasaun Kriminál (PSIK) ne’e ilegál.
Defensór Públiku, Fernando Lopes de Carvalho hatete tuir loloos prosesu halo aprensaun no buska ba krime ida tenke iha despaisu ida husi Tribunal.
“Ne’e mak ohin hatete dehan buskas no aprensaun ne’e tenke bazeia ba mandadu tribunál nian, tribunál mak bele hasai despaisu atu bele kaer ema halo buska ba ema nia domisiliáriu e halo aprensoens ba ema nia sasán, ne’e tribunál nia kompeténsia, tribunál hatete katak kapturasaun ne’ebé mak foin dadaun halo ne’e laiha flagrante delitu,”afirma nia.
Entretantu asaun buska ne’ebé hala’o husi ekipa konjunta iha loron segunda (16/01/2023) ne’e envolve husi Forsa Polisia Nasional Timor-leste (PNTL), liuhusi Servisu Informasaun Polisia (SIP), no FALINTIL Forsa Defeza Timor-Leste (F-FDTL), no Servisu Informasaun Militár (SIM/J2), Polisia Militár (PM) konjunta ho Polisia Sientífika no Investigasaun Kriminál (PCIC-Sigla Portugez), halo buska no apreensaun domisiliária bá eis Komandante Jeral PNTL ninia rezidénsia iha Likisá, tanba deskonfia rai subar arma funu nian.
Nune’e iha prosesu buska ne’e, konsege deteta Pistola Lot-9789 Made by Germany+Carregador ida ho bala hitu (7), totál (1). Kilat Air Force, Made in US, Model R-1212 totál 1. Kilat Marauder 177-Cal/4.Smm 2500 Psi (1). Kllat Sam Yang ind.co. Made in Korea, Golden Sayer air rifle Mud 700.cal.4,55mm (1). Kilat Rama, Horton Special edition, Made in US, B59748 (1).
Aleinde Munisoens Real Mi6 (309), Munisoens Kaliber-12 (2), Munis0ens Pistola Glock 19 (1,496), Munisoens Simulada Mi6 (160), Munisoens Klat Vinte Dois (22) (11), Munisoens Broning Ro’o (3), Rama Oan Red Zone 2219 (2), Bomba Kilat (3), Munisoens Maujer (6), Munisoens SKS (29), Munisoens J3 (168), Munisoens Boracha (19), Munisoens simulada Metra (99), Munisoens Kaliber 22 (11), Progetil M16 (1).
Jornalista : Ekipa Media Mudansa
Editór : Orlando magno