(Dili) Mudansa – Diretor Eskola Sekundariu Jeral 4 Setembro Martinho Menezes informa, Despaisu kona-ba farda foun ne’e, Ministru Edukasaun Joventude no Desportu (MEJD) fó sai de’it iha média maibé Eskola Sekundariu Geral 4 de Setembru seidauk simu despaixu direita husi MEJD.
“Despaizu husi Ministru Edukasaun Joventude no Desportu (MEJD) ba farda foun ne’e ami haree liu husi Media de’it tanba ami seidauk hetan despaixu direita husi MEJD, se governu hakarak halo farda foun iha fulan juñu no Juli tenke hatuun ona despaixu hodi eskola sira halo planu ba programa ne’e.” Dehan Diretor ESG 4 Setembro Martinho ba Jornalista Media Mudansa iha nia knaar fatin eskola 4 de Setembro Balide Dili, Kinta, 19/01/2023.
Diretór Martinho esplika, programa ne’e iha fulan Dezembru eskola simu tiha estudante mak despaixa ne’e foin sai, maibé liu tiha ona ne’e responsabilidade eskola ida-idak nian.
“Uniforme ne’e mai ita simu no koordena programa ne’ebé la’o mós nafatin la’o, tanba estudante sira selu tiha ona ne’ebé eskola 4 de Setembru sei uza farda anteriór, desizaun eskola nian teki uza farda anteriór se la uza ema li’ur tama mai iha área eskola mós ita la hatene tuir, ne’ebé tenke uza farda tanba farda sai hanesan identidade eskola nian,” Diretor Martinho esplika.
Nia relata, Etudante foun ba tinan 2023 hamutuk hamutuk 1700 resin totál estudante husi 10-° to’o 12-° hamutuk 4000 no mós kada sala ida estudante 56 tanba aula sufisiente ba estudante sira uza hodi aprende.
Iha sorin seluk, Ministeriu Edkusaun Joventude Desportu (MEJD), Armindo Maia relata, Eskola sira ne’ebé la kumpre sirkula iha rai laran ne’e, MEJD fó sai ona hodi bandu labele suku uniforme ba estudante sira iha tinan ne’e, bainhira la kumpre mak Ministeriu sei foti medida no fó sansaun ba eskola ne’ebé viola ida ne’e.
“Ita hasai ona sirkula ba eskola hotu atu bandu eskola no inan-aman sira labele suku uniforme ba estudante, tanba ita iha ona planu atu prepara modelu kór no uniforme nasionál ba eskola sira atu suku ba estudante sira,” Armindo Maia esplika.
Nia akresenta, kada sala ida estudante 45 ne’e ba eskola ne’ebé sala ho medida ki’ik, maibé eskola 4 de Setembru sala luan bele akumula estudante 50 ba leten, tanba sala 56 sufisiente ba estudante sira hodi halo prosesu aprendizajen sei fahe ba parte dadeer no loraik.
Tuir dadus totál Profesor/a Iha Eskola Sekundaria Geral 4 de Setembru hamutuk, Professor voluntáriu, kontratadu no permanente hamutuk 112, kompostu husi profesór voluntáriu na’in 14, profesór/a kontratadu na’in 10 no mós profesór/a permanente hamutuk na’in 88.
Jornalista : Delfina Borges
Editór : Orlando Magno
