(Dili) Mudansa – Negosiante Octávia de Grasa Araújo apresia ba Ministeriu Turismo Komersiu indústria (MTCI-sigla Portuges) ne’ebé loke feira iha portu Dili hodi enkoraja grupu produtu lokál sira atu promove nafatin produtu Timor nia rasik.
Negosiante Octávia de Grasa Araújo husi munisípiu Aileu ne’ebé mak partisipa iha feira ida ne’e informa, atividade ne’ebe organiza husi MTCI ne’e di’ak tebes tanba atu promove liu tan Timor Leste nia produtu lokál iha mundu internasionál
“Ami husi Grupo PROA Aileu,i ami mai atu promove ami nia produtu lokál, ami apresia tebes ba MTCI tanba konvida ami mai partisipa iha feira ne’e, hodi bele promove Timor-Leste nia produtu lokál,”dehan Octávia ba jornalista média mudansa iha portu Dili, Kinta 18/01/2023.
Nia haktuir, Grupo PROA husi Aileu hetan fundus husi CEI iha tinan 2015 ho montante orsamentu dolar 1.000.00 tanba grupu ne’e ninia atividade fokus ba produtór lokál.
“Bainhira Feira iha Dili iha, SEI sempre kontaktu ami hodi lori grupu nia naran tuir atividade ne’e, Produto lokál ne’ebé ami lori mai mak hanesan boliñus, fore rai, ai-fariña maran, koerambu no buat seluk tan,” katak nia
Octavia deklara, bainhira feira iha munisípiu seluk sira la partisipa tanba distánsia dook no kestaun ba transporte entaun sira tuir de’it feira iha Aileu no mós iha Dili.
“Sasan ne’ebé ami fa’an ne’e halo rasik husi uma depois mak fa’an no osan ne’ebé ami hetan husi feira ne’e la’ós dehan katak ami atu halo buat boot no atu sai riku liu maibé atu ajuda de’it ami nia moris loroloron,”nia afirma
Octavia rekomenda, husu ba parte relevante liuliu MTCI atu loke nafatin feira tanba liu husi feira ne’e ajuda tebes sira oinsá atu sai kreativu hodi promove timor leste nia produtu lokál iha rai laran no mós iha rai li’ur.
“Husu ba parte relevante sira atu loke nafatin feira, tanba liu husu feira ne’e bele promove nafatin ita-nia produtu lokál, nune’e mós husu ba maluk foin-sa’e sira labele depende beibeik ba governu bainhira iha inisiativa rasik hakarak atu halo buat ruma koko husi buat ki’ik hodi promove lokál sai di’ak liu tan,” nia hakotu.
Jornalista : Domingas Viana
Editór : Orlando Magno
