(Díli), Fomentu I, 28/05/2026 –Institutu of Business (IOB) Timor-Leste hala’o semináriu interativu ida ho tema “Hametin Kapasidade Joventude liu husi Edukasaun no Empregabilidade”, hodi hasa’e koñesimentu no prepara juventude sira atu enfrenta mundu servisu no kontribui ba dezenvolvimentu nasaun nian.
“Hametin Kapasidade Joventude Liu Husi Edukasaun no Empregabilidade”, semináriu ne’e fó motivasaun no inspirasaun ba juventude sira atu kontinua aprende no dezenvolve kapasidade profisionál.
Oradór prinsipal, Dr. Rui Maria de Araújo, enfatiza katak edukasaun no empregabilidade sai elementu importante ida atu prepara juventude sira bele responde ba dezafiu merkadu servisu no kontribui ba dezenvolvimentu nasaun.
“Iha fatin hanesan Dr.Rui Maria de Araújo, hatete katak iha Timor-Leste, eskola hotu-hotu iha nia kualidade rasik, no kualidade ne’e fila fali ba esforsu no kapasidade ema ida-idak nian,” dehan Dr. Rui Maria de Araújo iha Fomentu 28/05/2026
Nia mos apela ba estudante sira atu valoriza prosesu aprendizajen no aproveita oportunidade edukasaun ne’ebé iha, tanba kapasidade no disiplina pessoal mak bele determina susesu iha futuru.
Durante atividade ne’e, estudante sira husi IOB partisipa ativamente liu husi pergunta no troka hanoin kona-ba importánsia edukasaun no preparasaun profisionál ba juventude.
Estudante IOB, Aquino da Costa de Andrade, konsidera edukasaun nu’udar baze importante ida atu transforma joven sira no bele halo mudansa ba nasaun.
“Importánsia edukasaun iha tempu ohin mak bele forma joven no foin-sa’e sira atu sai ajente ida ne’ebé di’ak no kontribui ba futuru nasaun nian,” dehan Aquino.
Nia akresenta tan katak semináriu ne’e la’ós de’it aumenta koñesimentu, maibé mos motiva estudante sira atu kontinua aprende no desenvolve kapasidade.
“Ita nu’udar joven tenki aprende barak iha tempu hanesan agora, tanba ida ne’e bele sai oportunidade ida atu inspira joven sira hodi sai intelektuál iha futuru,” hatutan nia.
Iha parte seluk, estudante Eskola Téknika Informatika (ETI), Ana Fernandes husi Munisípiu Aileu, sente katak semináriu ne’e fó inspirasaun bo’ot ba juventude sira atu prepara aan ho di’ak ba futuru.
“Ohin loron ami aprende buat barak husi oradór Dr. Rui Maria de Araújo ne’ebé motiva tebes ami atu prepara di’ak liu tan ami nia-an ba futuru,” dehan Ana Fernandes.
Semináriu ne’e hatudu katak edukasaun no dezenvolvimentu kapasidade kontinua sai dalan importante ida atu juventude Timor-Leste bele enfrenta mudansa tempu no kontribui positivamente ba dezenvolvimentu nasaun nian.
Jornalista/Estajiada : Riana da Silva
Editor : Ana Maria da Silva
