(Dili), Mudansa–Joven foisa’e ho naran Erfina Amaral Soares ho nia ekipa hetan primeiru lugar ho totál orsamentu dolar amerikanu $ 2250.00. Ho kreativu dezenvolve Sabaun lokál iha Timor Leste hodi kompete iha negosiu inovativu daruak ne’ebé maka loke husi oraganizasaun UNDP no MTCI ho objetivu promove abilidade joventude sira nian iha aréa negosiu no mós haforsa empreza foinsa’e hodi kontribui ba desenvolvimentu ekonomia sustentavel.
Tuir manajer sabaun lokál Erfina Amaral Soares hatete, sentimentu kontenti tebes wainhira sira nia negosiu hetan primeíru lugar iha kompetisaun negosiu inovativu daruak, tanba ne’e maske hetan ona premiu maibé sira nia ekipa nafatin esforsu oinsa bele kontinua mantain sira nia negosiu sabaun lokál ne’e ba oin hodi kompete iha merkadu.
“Orgulhu tebes sai hanesan manan nain ba kompetisaun ne’e maske hakat to’o ona iha etapa ne’e maibé la fasíl mai ami tanba presija tebes tempu no enerjia barak. Nafatin agradese ba buat hotu ne’ebé maka ami hetan,” hateten manajer sabaun lokál Erfina Amaral Soares ba jornalista Mudansa.info foin lalais ne’e iha CCDD Kaikoli Dilí.
Nia deklara, ho produtu rai laran ne’ebé maka sira produz hanesan Sabaun Lokál husi transformasaun mina nu’u ba sabaun ne’e la’ós fasíl maibé servisu hamutuk ho ekipa sira hafoin bele hetan nia resultadu produtu.
“Ami hetan premiu iha kompetisaun ne’e ho produtu sabaun ne’ebé maka produz iha ita nia rain rasik ho material primas sira, hanesan mina nuu sai ba sabaun hodi ema bele uza ba nesesidade loron-loron nian,” Nia konta.
Nia relata, oras ne’e dadaun ekipa ne’ebé maka servisu iha produsaun Sabaun Lokál ne’e hamutuk traballadór nain 6 mesak feto de’it maske husi munisípiu ketak-keta halo produsaun ne’e maibé iha futuru sei halo rekrutamentu nafatin ba trabalhadór Timoroan sira ne’ebé maka hakarak servisu hamutuk.
“Ami nia produsaun nia lokalidade iha Dili no ami grupu feto, kompostu husi trablhadór ne’ebé mak mai hosi munisípiu oioin, hodi hamutuk kria negosiu ida ne’e no agora dadun fatin iha Komoro Dilí, hamutuk ho staff nain 6 kompostu husi,” Nia esklarese.
Nia planu ba oin nafatin explora sira nia produtu no mós bele hala’o kompetisaun iha merkadu lokál no internasional hatudu katak Timoroan rasik mós bele halo produsaun ba Sabaun Lokál iha nia rain rasik no la depende ona ba sabaun exportasaun hosi rai liur.
“Ba futuru konserteza ami sei dezenvolve ami nia produtu tanba ami hetan ona ekipamentus no apoiu husi governu, atu nune’e ami nia negosiu ne’e bele sustenta sosiedade ka komasumidór sira inklui mós bele kompete iha merkadu lokál no internasional,”Nia relata.
Ho esperansa ne’ebé bo’ot ekipa Sabaun lokál mós hakarak nafatin enkoraza joventude feto maluk sira inklui mós negosiante Timoroan sira atu bele kontinua nafatin kriatvu iha aréa negosiu nian no labele hakfodak ba problema ne’ebé mak hasoru maibé nafatin mai ho ideia inovativu iha negosiu liuhosi produtu lokál Timor nian.
“Espera kompetisaun ne’e sai motivasaun ba feto maluk sira inklui mós maluk joventude sira seluk no mós maluk negosiante sira seluk, oinsa sira mós bele explora sira nia produtu no halo inovasaun ba sira nia negosiu ka produtu rasik iha ita nia rain,”Nia hakotu.
Jornalista : Manuel Andrade
Editór : Azelio da Cruz
