(Dili),Mudansa – Moris kriatura Maromak nia iha mundu, dala barak fasíl ba ema atu haree no konta maibé, difisíl ba ema atu sente realidade moris ne’ebé Mau-Mali sente ho nia fen no oan iha uma laran.
Negosiante José Mau-Mali ho idade 36 husi Munisípiu Manatutu Postu Administrativo Soibada Suku Manu-Fahi, husik nia fe’en Domingas Pereira no oan nain 5 kompostu husi feto nain 2 no mane nain 3 mai buka moris iha kapitál Timor-Leste ba ekonomia uma laran ne’ebé nakdasak
Osan ne’ebé Negosiante Mau-Mali hetan husi nia negosiu hanesan, fa’an sigaru, pulsa telefone no Tua Sabu haruka kedas ba nia fen domingas hodi sustenta nesesidade uma laran no moris loro-loron hodi garante ahi matan iha dapur labele mate.
Haree husi fiziku José Mau-mali mós kategoria ema ho difisiensia matan parte karuk, maibé ida ne’e la difikulta nia hodi hala’o aktividade loro-loron iha ne’ebé atividade hahu iha tinan 2021 to’o agora.
“Ha’u fa’an sigaru, pulsa telefone no tua sabu hodi sustenta ami nia moris loro-loron nian, no ha’u mós fa’an tua sabu iha uma, ida nee mós ema barak mak ba sosa,” dehan negosiante fa’an sigaru José Mau-mali ba jornalista mudansa.info, iha Balide Dili (Kuarta, 15/06/2022).
Mau-Mali informa, negosiu dahuluk ne’ebé mak nia halo la’os fa’an sigaru no pulsa maibé, antes ne’e josé Mau-Mali hili fatuk iha Manatutu hodi fa’an ba kompaña sira, inklui mós fa’an Tua mutin ne’ebé mak nia prodúz rasik.
Aktividade ne’e nia senti difisíl tebes atu hetan osan lalais ho ida ne’e, nia hili dalan seluk hanesan fa’an sigaru no pulsa iha dalan ninin no mós hamrik iha fatin ne’ebé mak transporte públiku sira liu ba mai hodi ema bele sosa.
“Uluk ha’u hili fatuk fa’an ba kompaña sira sosa maibé sira fó de’it nota, to’o ret 60 mak sira selu dala ida, aktividade negosiu ne’e iha tinan 2018 iha soibada, Manatutu, inklui tua ne’ebé mak ha’u prodúz maibé kolen liu no osan mós tama araska ho ida ne’e ha’u deside faan de’it sigaru,” Mau-Mali Konta.
Nia subliña, aktividade negosiu hahu ho osan dolares 100, maibé dadaun ne’e hatudu ona resultadu balun ba nia moris mak hanesan harii uma ba nia fen no oan sira hela, inklui sosa fasilidade uma laran nian.
“durante tinan rua ona ne’e hau hetan osan to’o ona $.3,000.00 tamba kada fulan osan husi sigaru ho pulsa hamutu $ 300.00 no tua sabu bele to’o $ 100 karik ema sosa barak, maibé balun gasta ona tanba sosa material uma nian no osan balun sosa lapizeira no kadernu ba labarik sira nia hodi asesu ba edukasaun,” nia relata.
Entretantu José Mau-Mali hahu nia atividade fa’an sigaru ho pulsa husi Tuku 06 dader to’o tuku 09 kalan mak fila ba uma hodi deskansa iha tempu kalan.
Jornalista : Manuel Andrade
Editor : Orlando Magno
