(Bobonaru), Mudansa – Joven mane ida ho naran Bonifacio Cardoso “Bony Margon” hanesan Diretor ba Restorante Margon Sabor Lokál, (MARSABLO), hanoin atu dezemvolve rai laran, suku inklui bairo rasik liu husi fó servisu ba joven sira tanba dezempregu makas iha Timor-Leste.
“Hau rasik mak harii, hanesan mós Diretor ba restorante MARSABLO, no negosiu ne’e sei uza de’it produtu lokál, razaun hakarak promove produtu lokál hanesan talas, aifarina, manu Timor no seluk tan, aproveita mós fó servisu ba joven sira iha bairo laran,” dehan Diretor MARSABLO Bony Margon ba Mudansa.infó iha nia rezidensia Maliana Bobonaru, kuarta, (15/06/22).
Diretor Bony Margon infórma, Razaun harii no loke restorante halo negosiu objetivu atu hafórsa ekonomia uma laran no mós hakarak fó servisu ba familia no joven maluk sira iha bairo maibé depende ba joven ne’ebé iha koñesimentu area restorante, hanesan fiar aan, no mós iha vontade.
Diretor MARSABLO Bony Margon espllika, La iha ema ida mak inspira nia maibé nia rasik iha inisiativa tanba durante tinan haat ba Bony Margon servisu iha Hotel Novu Turismu aproveita aprende oinsa mak bele loke rasik restaurante, oinsa halo atendimentu ba ema, no seluk tan
“Bainhira ha’u ba han iha ema nia restorante sempre mósu hanoin ida dehan núne’e, Bainhira mak ha’u nia sai hanesan ne’e, liafuan ne’e motiva ha’u hodi hanoin hamrik mesak atu faan produtu lokál sira, maibé ida ne’ebé motiva liu ha’u mak hakarak sai emprendór ne’ebé koñesidu iha Timor,” Bony Margon promete.
Bony Margon esplika, negosiu ida ne’e lokálidade iha bairo Boracha laran suku Lahomea postu administrativu Maliana munisipiu Bobonaru iha ne’ebé mai husi hanoin inovativu no simples maibé konsege hatudu rezultadu ne’ebé furak iha ema nia haree entaun bele dehan negosiu joven inovativu.
“Hau hanoin negosiu nee sei fó benefisiu ba públiku no komunidade ne’ebé hela besik tanba ha’u sei sosa sira nia produtu lokál no naan sira hanesan manu Timor, naan karau, naan fahi no seluk tan, tanba hau nia restorante ekipamentu kompletu ona maibé, konaba poupa osan hau sente seidauk bele dehan sai tanba fóin hahu hanesan ne’e ita gasta mak barak liu” Diretor MARSABLO esplika.
Bony Margon relata, planu barak mak nia atu halo iha futuru oin mai, liu-liu hanoin atu dezemvolve restorante atu sai hanesan negosiu ne’ebé fó benefisiu ba joven sira no mós ema hotu.
“Iha inisiu ne’e, Ha’u seidauk deside atu fó servisu ba ema barak tanba fóin hahu maibé primeiru ha’u sei fó servisu ba joven nain tolu ka haat hanesan ne’e depois tuir fali mai ita rekruta tan joven sira atu servisu iha fatin ne’e,” nia esklarese.
Diretor MARSABLO Bony Margon, akresenta, Iha parte seluk nia prepara ona Guest House ne’ebé konstrui tiha ona sei dezemvolve di’ak liu tan, no mós nia hakarak aumenta konstrusaun fóun iha nia bairo laran.
“Susesu sei la mai husi ema seluk maibé susesu sei mai husi ita nia aan rasik, hanoin ita nia mehi, husik mehi iha kama leten hamrik hodi sai joven ne’ebé inovativu hodi hatudu ba públiku katak ita mós bele,” Diretor MARSABLO Bony Margon hato’o mensajen ba joven sira.
Jornalista : Orlando Magno
Editór : Felisberto F. da Costa