(Díli) Farol– Timor-Leste Musik Awards 2025 (TILMA) nuudar atividade importante iha mundu muzika no programa nee nuudar oportunidade diak ba artista Timor oan atu kapasita sira-nia kapasidade no promove identidade kulturál hodi kontribui ba dezenvolvimentu nasionál, tanab ne’e iha tinan ida ne’e aumenta tan kategoria tolu hanesan; kategoria espesiál, kategoria muzika tebe tebe no kategoria muzika relijiozu.
Vise Prezidente ALMAMOR, Paulino Pacheco Magno, hatete, Timor-Leste Musik Awards 2025 (TILMA) nuudar atividade importante iha mundu muzika no kria plataforma ba artista sira atu hetan rekoñesementu di’ak iha rai laran no iha palku internasionál.
Nuudar atividade prestijioza ida neebé mak riku iha inovasaun no kreatividade iha mundu muzika nian, programa ida nee atu fó biban hodi hametin liu tan identidade kulturál, kria plataforma ba artista sira atu hetan rekoñesimentu diak iha rai laran no iha palku internasionál, ikus mai bele kontribui ba dezenvolvimentu industria muzika no ekonomia iha rai doben Timor-Leste, dehan Vise Prezidente ALMAMOR, Paulino Pacheco Magno, iha Skyra Coffee Shop, Farol, Díli, 24/10/2025.
Vise Prezidente ne’e informa, objetivu husi eventu Timor-Leste Musik Awards 2025 realiza ona iha tinan kotuk no kontinuasaun iha tinan ida nee, atu fasilita opotunidade ba artista Timor oan sira bele promove sira-nia talentu no lori Timor ba mundu.
Eventu Timor-Leste Musik Awards 2025 hanesan ita hotu hatene nia realiza tiha ona iha tinan 2024, iha tinan ida nee ALMAMOR nafatin halo apresiasaun ba artista Timor oan neebé iha kriasaun muzika neebé inspirativu, edukativu, informativu, divertimentu, Dehan nia.
Nia salienta tan, dominasaun ba kategoria hirak neebé sei akontese iha fulan dezembru tinan ida nee, neebé fó oportunidade atu fó apresisaun ba muzika no artista neebé kontribui ba sosiedade, liu-husi sira nia obra.
Liu-husi Timor-Leste Musik Awards 2025 ida nee, ita nia apresiasaun no fó ondra ba ema-sira neebé hakerek ho kanta, partilla informasaun no lori Timor-Leste nia naran ba mundu no fahe informasaun liu-husi muzika divertimentu ba sosiedade, nia salienta.
Nia hatutan, TILMA dau-daun aumenta tan kategoria tolu mak hanesan kategoria espesiál, muzika tebe tebe no muzika relijiozu atu reprezenta identidade kultura Timor nian.
Tinan kotuk ita mai hanesan inisiu ho kategoria hira deit, tinan ida nee la hanesan, agora ita aumenta katerogia tolu (3) hanesan; espesiál kategoria, kategoria muzika tebe-tebe hanesan músika neebé atu representa muzika identidade Timor-Leste nian, ida mak muzika relijiozu tanba ita hatene 99% ema Timor-Leste iha relijiaun katólika, TILMA la haluha atu hatama tan kategoria sira ne’e ba iha Timor-Leste Musik Awards 2025, iha tinan 2024 la sala iha kategoria sanulu resin ida (11), iha tinan 2025 aumentan tan kategoria tolu (3) hamutuk kategoria (14), nia hatutan.
Nia mós dezafia ba arista Timor oan ka iha diaspora bele partisipa no rejistu sira nia obra, tanba loke ona baze de dadus ba arista atu sai hanesan baze fundamentál ba prossesu dezevolve muzika ho industria iha rai laran, nee duni sira nia muzika no kategoria neebé komisaun organizadora prepara tiha ona hahú ohin ba oin bele rejistu online ka bele ba iha edefisiu ALMAMOR nian.
Nune’e nia dehan, Timor-Leste agora tama ona ba iha ASEAN, signifika katak, industria muzika nakloke boot tan ona, hakarak ka lakohi tenke ba kompete ho nasaun seluk, nunee bele hamorin rai doben ida nee liu-husi industria oin-oin, liu-liu iha industria muzika
Tanba ne’e, nia sujere ba governu atu investe iha artista sira, tanba antigu artista sira mós hakerek muzika kona-ba libertasaun ukun rasik an nian, sira mós iha papél atu kontribui ba dezenvolvimentu.
Sujere ba governu Timor-Leste tempu ona atu investe ba artista sira, ituan ka barak, husi jerasaun artista antigu sira hakerek muzika ho lia-fuan iha momentu prosesu luta ba libertasaun ukun rasik an nian, tanba nee arista mós iha papél atu kontribui ba dezevolvimentu lori muzika industria nia ba oin, tenik nia.
Jornalista Quitu Pereira / Donato Da Cunha
Editora: Quisânia Gleide
