(Díli) Kaikoli-Asosiasaun Jornalista Timor-Lorosa’e (AJTL), Timor-Leste Press Union (TLPU) no Uniaun Profisaun Jornalista Timor-Leste (UPJTL) hamutuk ho Vítima jornalista Marino de Deus Pinto ne’ebé mak estudante Universidade de Díli (UNDIL) baku iha loron tersa 21 Outubru 2025 iha UNDIL, no ohin hato‘o ona keixa iha Ministériu Públiku (MP) atu prosesu kazu ne’e ba oin.
Porta Voz Asosiasaun Jornalista, Horacio Babo, hatete, iha oknum estudante balun ne’ebé mak baku jornalisita bainhira jornalista ne’e hetan konvite husi vítima asédiu sexuál hodi halo kobertura kona-ba kazu asédiu sexuál ne’ebé mak deskonfia envolve dosente LMS iha UNDIL, tanba ne’e asosiasun jornalsita sira akompaña hela vítima jornalista ba hato’o keixa iha Ministériu Públiku.
“Ohin ami akompaña nia mai iha ne’e, atu hato’o keixa, hodi nune’e bele loke prosesu ne’e ba oin, keixa ne’e ami hatudu ba oknum estudante ne’ebé mak halo violasaun ba ami nia jornalsita ne’e, depois prosesu tomak ba oin mak ita hare’e”,dehan Porta Voz Asosiasaun Jornalista, Horacio Babo, ba jornalista sira iha edifisiu Ministériu Públiku Kaikoli, Kinta 23/10/2025
Asosiasaun Jornalisita sira simu universidade de Díli (UNDILI) ne’ebé mak husu deskulpa ona ba jornalista sira, maibé asosiasaun jornalista kontinua hamutuk ho vítima jornalisita kontinua keixa aktu krime ne’ebé estudante sira halo hasoru jornalista ne’e.
“Husu deskulpa ita simu, maibé buat ida krime nia dalan mak ita tenke liu husi prosesu justisa, atu nune’e hatudu katak la’os ba jornalisita de’it, ba se de’it mak bainhira temi ona tenke liu husi prosesu, atu nune’e bele julgamentu to’o iha tribunal se mak loos se mak sala, tanba ne’e ema, jornalsita mós ema, la’os ita konvida tiha ba, depois tula fali liman ne’e lae”, nia subliña.
Iha sorin seluk, Prezidente Konsellu Imprensa Timor-Leste (KITL), António M.D. Cesar Moniz Mali hatete, Konsellu Imprensa apoiu 100% ba Asosiasaun Jornalista sira tanba ho rapidamente halo ona keixa iha Ministériu Públiku.
“Konsellu Imprensa apoiu 100%, tanba ne’e ha’u louva ho Asosiasaun Jornalista Timor-Lorosa’e (AJTL), Timor-Leste Press Union (TLPU) no Uniaun Profisaun Timof-Leste (UPJTL) ne’ebé mak rapidamente responde ho lalais, ita suporta malu, prosesu lezada nian Konsellu Imprensa prontu hamrik iha kotuk atu partisipa iha prosesu tomak wainhira ita bo’ot sira lori ona ba iha Ministériu Públiku ka Tribunal”, dehanPrezidente Konsellu Imprensa.
Enkuantu, Vise Reitór asuntu Estudanitil Universidade de Díli (UNDIL), Feliciano Pinto Magalhães, hatete, asosiasaun Jornalisita sira hamutuk ho jornalsita lori kazu ne’e ba oin, ida ne’e sira nia direitu, bainhira notifikasaun mai ona mak estudante sira ne’ebé halo asaun ne’e ba hatan.
“Se lori ba direitu sira nian, ita labele limite fali sira nia direitu ne’e lori ba, depois justisa lao ba mak estudante ida ne’ebé halo asaun ne’e ba hatan,” dehan, Vise Reitór asuntu Estudanitil Universidade de Díli (UNDIL) Feliciano Pinto.
Nia haktuir, bainhira asosiasaun jornalsita ho jornalista sira keixa estudante entaun estudante mak ba hatan tuir aktu ne’ebé mak estudante sira halo, maibé keixa universidade entaun universidade mak ba hatan, tanba universidade iha ninia lideransa ne’ebé mak iha.
“Se keixa estudante, entaun estudante mak ba, ida ne’e bolu ba para ba hatan iha ne’eba tuir duni aktu ne’ebé mak halo, se karik bolu ba pasti lori ba ne’e estudante UNDIL, se UNDIL ona pasti iha UNDIL mós ba hatan, tanba UNDIL iha ninia lideransa, ne’ebé bele akompaña estudante bele ba”,nia afirma.
Jornalista: Sandi Belo
Editora: Quisânia Gleide
