(Díli) Liceu- Centru Audivizuál Max Sthal Timor-Leste (CAMSTL) realiza espozisaun ho forma fotográfia no video hodi komemora loron trajedia masakre Santa Krús 12 Novembru ba dala 34 ho tema “Husi Trajédia ba Esperansa: Tinan 34 Viajen Nasaun nian no Santa Krús 1991, Kanek Tuan, Espiritu Foun”.
Diretór Sentru Audivizuál Max Sthal, Eudicitio Pinto, hatete, objetivu halo espozisaun ne’e hodi fó onra ba martíres sira ne’ebé fó sira nia vida ba rai ida ne’e, liu-liu iha akontesementu masakre Santa Krus nian iha tinan 1991, nune’e iha selebrasaun loron ida ne’e reprezenta martíres sira hotu.
“Espozisaun sira ne’e uza imajen istórika sira ne’ebé Max Stahl hasai iha momentu pasadu atu kontinua prezerva no valoriza martíres sira nia luta”, Dehan Diretór Eudicito Pinto ba jornalista sira iha nia kna’ar fatin, Segunda, 28/10/2025.
Nia dehan, husi espozisaun ida ne’e sira mós hakarak loke espasu dialogu entre jerasaun tuan ho jerasaun foun sira, signifika durante espozisaun sei iha aprezentasaun husi sobrevivente martíres sira nian ba estudante sira atu hatene istória pasadu.
“Husi espozisaun ida ne’e ami mós hakarak loke espasu dialogu entre jerasaun tuan ho jerasaun foun sira, signifika durante espozisaun sei iha aprezentasaun husi sobrevivente martíres sira nian ba estudante sira atu hatene istória pasadu, tanba loron masakre Santa Krús ne’e importante tebes ba Timor oan tomak, no loron ne’e konsidera hanesan janela tanba ema hotu koñese Timor ne’e liu husi loron ida ne’e, nune’em ho esforsu jornalista Max Stahl nian hodi konta ka halo sensibilizasaun istóriku ida ne’e ba mundu tomak”, informa nia
Nia hatutan, atividade ne’e sira hetan apoiu husi Gabinete Apoiu Sosiedade Sivíl nian, maibé kona-ba orsamentu sira parte administrasaun finansa mak hatene.
Iha Fatin hanesan, Adjuntu Komite 12 Novembru, Jaime Francisco Fátima de Jesus Soares, hatete, atividade ne’ebé CAMSTL halo mak loke espozisaun ba obra fotográfia, videográfia kona-ba 12 Novembru nian, ba sobrevivente sira neʼebé mate ona ho sira nia ruin durante tinan hirak liu ba, balun hetan ona no balun seidauk rekolla.
“Tanba ne’e, preparasaun ba loron 12 Novembru hanesan kada tinan halo ne’e, ami nia oan sira mak halo, tanba ami nia oan sira iha organizasaun hanaran jerasaun 12 Novembru, sira servisu parseria ho Ministériu Joventude Desportu Arte no Kultura (MJDK) kada tinan sira mak organiza eventu 12 Novembru nian”, dehan nia
Entretantu, atividade ne’e hetan apoiu husi Gabinete Apoiu Sosiedade Sivíl (GASC) no atividade espozisaun hahú abertura iha segunda (28 Outubru 2025) no sei taka iha loron 12 fulan-Novembru 2025.
Jornalista: Rogerio Anuno
Editora: Quisânia Gleide
