(Díli) Mudansa -Prezidente Bankada Partidu Libertasaun Popúlar (PLP), ohin halibur malu atu selebra okaziaun istóriku bá nasaun doben Timor-Leste loron 30 fulan agostu tinan ne’e.
“Ohin ita halibur malu atu selebra okaziaun istóriku ida bá ita-nia Nasaun doben ida, iha loron 30 fulan Agostu tinan 1999, Povu Timor-Leste ezerse sira nia direitu bá auto determinasaun no hili dalan bá ukun rasik-aan, iha konsúlta popúlar ida ne’ebé livre no demokrátiku organiza hosi Nasoins Unidas, Timoroan sira, fiar-aan iha sira nia konviksaun, ho aten barani deside atu halo pasu ireversivél bá formasaun Estadu Soberanu ida,” Dehan Prezidente bankada PLP, Maria Angelina Lopes Sarmamento iha serimónia Solene iha PN, Sesta-Feira (30/08/24)
Deputada ne’e akresenta, ida-ne’e maka vitória ida bá Povu ida, Nasaun ida, ne’ebé unidu iha objetivu komún ida,ne’e maka vitória Timoroan sira nian ne’ebé iha adversidade, konsege haree esperansa, hamriik aas, iha Timor iha rai liur, sira mantein ahi-lakan mehi Nasaun Independente moris no determinadu.
“Ida-ne’e maka vitória ida bá sira ne’ebé terus nunka rende, bá sira ne’ebé sempre fiar katak laiha foho ida, maski aas oinsá, bele taka loro-matan,ha’u hakarak repete ho onra katak ita konta nafatin ho apoiu Internasionál,nu’udar Nasaun maun-alin sira, maski liafuan Timor bisu-bisu de’it, la haluha ita, kontinua defende ita no halo asuntu ida-ne’e sai importante liután iha espera Internasionál sira, klaru katak ha’u refere bá Portugál ne’ebé sempre sai parte integrante ida hosi ita-nia istória no konserteza sei sai parte ida hosi ita-nia futuru,” governante ne’e afirma
Deputada ne’e hateten, vitória ida-ne’e nunka bele hasai hosi ema, maibé sira labele haluha katak dezafiu sira seluk mosu ohin loron,konsolidasaun Estadu Demokrátiku ida husi sira, bazeia liu-liu bá respeitu bá liberdade, Direitu Sivíl no Polítiku, tuir regra sira toleránsia nian.
“Laiha lakon-na’in ka manan-na’in, iha de’it alternasaun normál ne’ebé maka karakteriza rejime livre no demokrátiku sira. Liutiha luta prolongada ida durante tinan 24, komúnidade Internasionál rekoñese soberania ita-nia Estadu nian, ne’ebé proklama iha loron 28 fulan Novembru tinan 1975, no Restaurasaun Independénsia iha loron 20 fulan Maiu tinan 2002, nu’udar afirmasaun bá ita-nia identidade, ne’ebé materiáliza iha ezersísiu soberania ida ho rekoñesimentu Internasionál,ami nia agradesimentu sinseru bá Governu Portugés bá sira-nia apoiu ne’ebé la nakdoko hodi mantein Timor-Leste nia ajenda,durante mandatu nu’udar Primeiru-Ministru Portugal nian, husi tinan 1995 to’o 2002, SekJer António Guterres envolve maka’as iha esforsu Internasionál hodi rezolve krize iha Timor-Leste,ita-bo’ot nia dedikasaun no kompromisu bá ami nia kauza sai instrumentál hodi asegura katak ami nia lian sira rona,” Tenik Nia
Nia akrezenta, valoriza Nasoins Unidas nia envólvimentu iha konsólidasaun Estadu Demokrátiku iha rai Timor,ONU nia esforsu sira sai hanesan instrumentu hodi ajuda estabelese sosiédade ida ne’ebé estavél no demokrátiku.
“Iha biban espesiál ida ne’e, ami senti onradu tebes ho prezensa Sekretáriu Jerál Nasoins Unidas nian, Antonio Guterres nian vizita mai Timor-Leste nu’udar sasin ida kona-bá amizade no parseria ne’ebé dura entre Timor-Leste no Nasoins Unidas,maski ita tenki rekoñese katak Timor-Leste oras ne’e hasoru dezafiu signifikativu, inklui pobreza, inseguransa ai-han, dezempregu, Edukasaun ho kualidade ki’ik no fatuk kuak fiskál ne’ebé mosu daudaun, hodi hasoru kestaun sira ne’e, importante tebes atu ita uza unidade no determinasaun hanesan karakteriza ita nia konsúlta popúlar istóriku, unidu ita bele ultrapasa obstákulu hirak ne’e no serbisu bá futuru ida ne’ebé nabilan liu, prósperu liu bá Timor-Leste, atu konklui, mai ita aproveita oportunidade ida-ne’e hodi reflete kona-bá ita-nia reálizasaun sira, rekoñese apoiu husi ita-nia belun no parseiru sira, no hafoun fali ita-nia kompromisiu atu harii futuru ida ne’ebé nabilan liu bá Timor-Leste,” Nia hakotu
Jornálista: Esperança Monteiro Soares
Editóra: Delfina Borges
