(Díli) Mudansa- Konsellu Imprensa halo konferensia imprensa kona-bá rezúltadu levantarnentu (KI) nian ba interferénsia deskonfia intervensaun SEKOMS nian iha redasaun RTTL.EP
“Konselho Imprensa Timor-Leste (KI), nuda’ar entidade administrativa independenti ne’ebé ba iha setór komúnikasaun sosiál nian, defini ona iha Lei komúnikasaun sosiál númeru 5/2014, loron 19, fulan novembru, no dekretu Lei númeru 25/2015, ho knaar atu asegura liberdade imprensa no liberdade espresaun,” Dehan Prezidente Konsellu Imprensa Otelio Ote bá Jornálista iha salaun CI Segunda-Feria (05/08/24)
Prezidente ne’e haktuir,hakat husi baze legál ne’e iha konsellu Imprensa nia ezisténsia hahú fulan maiu tinan 2016 to’o agora ne’e kuntinua asegura servisu Jornálizmu no media inklu hamrik metin bá defende no asegura públiku sira nia direitu atu hetan notisia ne’ebé loos, momoos no kuálidade tuir Lei komúnikasaun sosiál no regulamentu Consellu Imprensa nian.
“Hanesan ita hotu hatene ona iha fulan hirak liu ba mósu notisia iha midia balun ne’ebé deskonfia intervensaun Sekretariu Estadu Komunikasaun Sosial (SEKOMS) nian iha redasaun Radiu Televizaun Timor-Leste. Eprezariu Públiku (RTTL.EP) liga ho notisia kona-bá Primeiru Ministru Xanana Gusmão ne’ebé lakohi kaer liman ho membru Governu sira bainhira fila hosi Swiss, iha loron 23 fulan Abril tinan ne’e,Tenik Prezidenti KI
Nia esplika,bazeia bá informasaun ne’e maka Cl estabelese nia komisaun ida hodi buka hatene loloos faktus kona-bá informasaun ne’e, Komisaun hahú nia servisu durante fulan juñu no jullu hodi buka informasaun diretas husi entidade oi-oin inklui Jornálista RTTL.EP. liu hosi dadus ne’ebé hetan komisaun konklui ho faktus sira tuir mai.
“SEKOMS bá duni iha sala redasaun RTTL.EP nian iha loron 23 fulan Abril tinan 2024 akompaña husi Prezidente Consellu Administrasaun RTTL.EP,SEKOMS rasik wainhira partisipa nuda’ar oradór iha the DILI Dialogue Forum rekoñese katak ba duni iha sala redasaun RTTL.EP, konfirma katak SEKOMS halo duni intervensaun ba sala redasaun RTTL.EP nian hodi muda konteúdu notisia ho titulu Primeiru Ministru Lakohi kaer liman ho membru Governu wainhira fila hikas husi Swiss to’o Dili,” Nia relata
Nia hateten,bazeia ba faktus hirak ne’e, Consellu Imprensa hola pozisaun kondena maka’as asaun intervensaun ne’e tanbá, atetude ida ne’e kontra artigu 40 Konstituisaun RDTL pontu 2 ne’ebé dehan “liberdade koalia no informasaun nian labele hetan limitasaun husi sensura ruma.
“Lamenta atetude ne’e, tanbá asaun ne’e bele kontribui bá hatun ranking liberdade imprensa Timor-Leste nian iha tinan hirak oin mai,Consellu Imprensa husu bá SEKOMS atu hapara intervensaun bá redasaun media hotu iha Timor-Leste iha futuru hodi hametin no asegura liberdade imprensa no liberdade espresaun,KI hato’o nia apresisaun bá parte hotu inklui Jornálista hirak ne’ebé kontribui ona informasaun hodi kompleta KI nia deskoberta sira kona-bá asuntu ne’e,” Nia dubliña
Prezidente KI Enkoraja midia no redasaun hotu atu hato’o Informasaun bá Konsellu Imprensa bainhira hetan intervensaun hosi se de’it ba sala redasaun sira.
“Rezúltadu levantamentu ne’e sei submete bá entidade hirak ne’ebé durante ne’e defende no promove liberdade imprensa hanesan Prezidente Repúblika, Parlamentu Nasionál, PDHJ, Asosiasaun Jornálista sira no sosiédade sivil, sei submete mós rezúltadu levantamentu ne’e bá SEKOMS nuda’ar referénsia,” Nia hakotu
Jornálista: Esperança Monteiro Soares
Editóra : Delfina Borges
