(Díli) Mudansa– Sekretáriu Estadu Igualidade interinu (SEI) no mós Sekretáriu Estadu Komunikasaun Sosiál (SEKOMS) iha segunda ne’e hala’o enkontru ho nain ba média sira inklui jornalista sira atu garante kobertura ne’ebé sensivel bazeia ba jéneru.
Objetivu husi enkontru ne’e mak oinsá atu fó hanoin ba média sira hotu atu halo kobertura ba assuntu igualidade iha rai laran, liu-liu ba susesu feto nia no kareira feto potensial sira, la’os públika bebeik ba violênsia doméstika (VD), violênsia bazeia ba jéneru (vbj) no violênsia seksual (VS), tempu ona atu promove feto nia susesu iha kualker esforsu ne’ebé sira luta.
“Tuir ha’u ita persiza hare’e barak liu tan atu kolega jornalista sira bele hatene di’ak liu tan oinsá halo notísia ne’ebé sensivel ba jéneru ha’u konkorda ho kolega jornalista sira ohin ko’alia ne’e ita agora hare’e liu ba pozetivu ba susesu ne’ebé inan feton sira halo ita la bele foti de’it violênsia ne’ebé mane halo ba feto, feto halo ba mane, feto halo ba labarik ou iha domestika sira halo iha uma laran, maibé oinsá média hanesan promotór ba iha vida komunidade saudavél presiza halo notísia susesu iha ita nia inan feton sira no labarik feto ne’ebé susesu ho talentu di’ak ida ne’e mak ita presiza promove,” esplika Sekretáriu Estadu SEKOMS Expedito Loro Dias Ximenes ba jornalista sira iha salaun SEI Caicoli Díli, segunda-feira 29/04/2024
Nia akresenta tan média nia papel importante mós oinsá atu muda públiku nia hanoin, no oinsá mós atu eduka sosiedade liu husi informasaun, tanba média iha pillar importante tolu ne’ebé presiza atu implementa ba públiku.
“Ita iha index liberdade imprensa, ita iha ASIA ita iha númeru 1, ita iha mundo ita iha númeru 10 tanto top ten ita iha mundo, ita buka oinsá ita nia index liberdade imprensa ida ne’e bele mantein ou bele sa’e tan, ita hein katak avaliasaun iha tinan ida ne’e ita bele mantein númeru 10 ou ita bele sae tan iha nivel mundo ita iha ASEAN ita bele mantein ho númeru 1 ida ne’e signifika katak servisu makas husi kolega média sira ne’ebé hala’o nia kna’ar hanesan média nia papel importante mak hanesan ohin ita hotu ko’alia kona-ba ita nia papel importante informa, eduka, diverte no halo kontrolu sosiál, kna’ar ida ne’e tuir ha’u nia observasaun katak durante iha IX governu konstitusional kolega média sira hala’o duni respeita duni nia kna’ar no hakruk duni ba iha kodigu étika jornalizmu nian,” dehan nia
Iha fatin hanesan diretór jeral SEI Armando da Costa hatete, ojetivu husi enkontru ne’e atu halo koperasaun servisu entre SEI ho média sira liu-liu publikasaun ne’ebé média sira públika laiha assuntu igualidade jéneru no inkluzaun.
“Ohin SEI organiza enkontru hamutuk ho média nain sira ho objetivu primeiru ita hare’e kona-ba servisu hamutuk ou koperasaun servisu entre SEI ho média sira iha relasiona ho publikasaun média nia atu asegura katak iha publikasaun sira ne’e sensibilidade ba kestaun igualidade no inkluzaun,” dehan DJ SEI Armando da Costa
Nia relata tan, objetivu tuir tan maka atu sai parseria servisu ne’ebé di’ak liu-liu atu partisipa iha treinamentu no formasaun sira ne’ebé antes ne’e implementa ona iha instituisaun média balun, atu kontinua mós ba média sira ne’ebé antes ne’e seidauk iha inklui iha formasaun refere, atu troka mós ideia entre SEI ho média sira atu publikasaun média sira nian kualidade liu tan iha sensibilidade jéneru.
“Tuir fali para bele explora possibilidade servisu hamutuk ba oin hanesan formasaun, treinamentu sira ne’ebé iha antes ne’e ita halo ona ba iha média balun hanoin para ita atu bele kontinua atividade formasaun sira ne’e hodi bele apoiu malu iha publikasaun sira bele sai sensivel liu tan ikus atu troka hanoin ba expetativa ba SEI karik saida mak SEI bele halo atu bele hasa’e liu tan kualidade em termus de sensibilade ba jéneru,” hakotu DJ SEI
Iha enkontru ne’e Xefe Departamentu Komunikasaun, Idina Araújo halo mós observasaun no avaliasaun ba média imprime ha’at ne’ebé durante ne’e halo publikasaun ba iha asuntu refere mak hanesan Timor Post, Suara Timor Lorosa’e (STL), Indepedente no Diário Nasionál.
Entretanto partisipa iha enkontru ne’e mai husi média sanulu resin rua (12) mak hanesan: RTTL.EP, GmnTV, Indepedente, Timor Post, RTM, SMNews Timor, Média Labeh, Hatutan, Tatoli.IP, Lafaek News, TVE no DíliPost.
Jornalista : Remigia Locateli
Editora : Sandi Belo
