FMSI Lamenta, PNTL “Baku” Joven Na’in Rua Kaer Bandeira TL Ho Palestina

banner 120x600

(Dili) Mudansa – Kordenador Jeral FMSI Constantino de Jesus la menta ho asaun polisia baku joven nain rua neebe fo solidariedade ba povu palestina tanba Solidariedade la’os krime ida iha Estado de Direito demokrátiku maibe Solidariedade nu’udar prinsípiu orientadór ba Timor-Leste atu ema hotu iha direitu atu fó solidariedade ba sé de’it.

Membru Frenti Maubere Solidariedade Internasional (FMSI) na’in 2 hetan baku husi Membru Polisia Nasional Timor-Leste (PNTL) tanba kaer bandeira Palestina ho bandeira Timor-Leste iha konsertu laran.

Iha ne’ebé, Atividade konsertu públiku ne’e realiza husi Ministériu Juventude Desportu Arte no Kultura hodi komemora loron nasionál Joventude no Masakre Santa Krus 12 novembru ba dala 32.

“Jóven na’in rua espresa solidariedade ba povu iha mundu ne’ebé luta ba sira-nia independénsia, hanesan mós uluk mundu fó solidariedade mai Timór Leste Polisia nia atuasaun ne’e fora hosi lei, ditadura, autoritáriu no militerízmu tanba solidariedade la’ós krime no korrupsaun,”katak koordenadór ba jornalista liu husi komunikadu imprensa iha Faról Dili, segunda, 13/11/2023.

Nia hatutan, lei define demonstrasaun ka okupa dalan públiku mak bele avizu ba Polisia maibé aktu ida horikalan ne’e la’ós demonstrasaun no la’ós manifestasaun maibé lori bandeira ne’e atu hatudu no espresa nia sentimentu solidariedade ne’ebé joven na’in 2 halo la’ós demonstrasaun ne’ebé prevee iha lei.

“12 novembru ne’e loron juventude nasionál no loron istóriku ne’ebé mundu  solidariza ita-nia luta ba libertasaun nasionál ho ida ne’e  joven na’in 2 hatudu nia sentimentu liu husi  kaer bandeira povu Palestina ninia katak povu sei terus  no vítima ba violasaun direitus umanus,” koordenadór afirma.

Vítima Paulo Soares membru husi FMSI esplika, iha konsertu ne’e vítima na’in 2  hakarak atu espresa sira ninia  sentimentu solidáriu ba povu Palestina liu husi kaer bandeira Palestina no bandeira Timor Leste  maibé iha autoridade Polisia ho intelijénsia hadau bandeira no kaer joven na’in 2 tuir prosesu  investigasaun

Kazu ne’e akontese 12 Novembru Kalan Horkalan bainhira joven na’in rua kaer Bandeira Timor-Leste no mós Bandeira Palestina nia ho intensaun ida atu hato’o sira nia solidáriu ba povu Palestina maibé iha tempu hanesan por volta tuku 10 minutu ida hanesan ne’e autoridade Polisia intelijénsia hadau kedas bandeira iha sira nia liman.

“Hau hetan baku husi Polisia iha kabun no tebe dala tolu inklui basa dala ida, tanba Polisia sira kondena maka’as katak ha’u ema terrorista, ema milísia no ema ne’ebé hetan pagamentu husi ema ruma mak obriga ha’u hodi halo aktu hirak ne’e maibé realidade lae,” konta vítima Paulo.

Nia haktuir, asaun solidariedade internasionál ba povu Palestina ida ne’e nu’udar Timor oan durante luta ba independénsia no mós hetan solidariedade maka’as husi nasaun seluk hafoin akontesimentu 12 novembru masakre santa kruz, konsege to’o hetan independénsia ho Aktu kapturasaun ida ne’e ilegal no la bazeia ba lei.

Iha sorin seluk vítima Nelson Roldão Xavier afirma, juventude hotu iha direitu atu espresa nia sentimentu maibé autoridade Polisia sente ida ne’e hanesan krime no  aktu ida ne’ebé la’ós to’o iha eskuadru PNTL na’in feto nia kolega hetan basa iha nia oin no nia rasik la hatene tanba sá, karik nia halo sala ou halo krime ruma?

“Nu’udar sidadaun ida ami kumpre konstituisaun RDTL  atu fó solidariedade ba sidadaun se de’it no iha nasaun ne’ebé de’it mak hetan terus, susar no sofre hela husi rai seluk ninia hahalok ami fó ami nia solidariedade ba ida ne’e,” nia deklara.

Polísia kaptura Nelson nia kolega ba tiha karreta laran depois Polisia fila mai hodi husu husu klarifikasaun ruma kona ba ida ne’e, maibé to’o iha ne’ebá la husu klarifikasaun maibé sira hetan de’it mal tratamentu husi parte Polisia nia no intelijénsia.

Jornalista :Domingas Viana

Editor        : Orlando Magno

banner 325x300