(Dili) Mudansa – Eleitu Xefe Suku iha tinan ne’e sei simu tomada de pose hafoin hasa’e Bandeira iha serimónia komemorasaun aniversáriu proklamasaun independénsia 28 Novembru 2023 ne’ebé realiza iha Munisipiu 12 inklui RAEOA no mós postu sira.
Tanba Minísteriu Administrasaun Estatal (MAE) Tomás do Rasario Cabral ho Primeiru Ministru (PM), Kay Rala Xanana Gusmão hasai ona despaixu ida atu nomeia membru Governu ida-idak ba munisípiu no postu bainhira membru governu la to’o.
Sei hili reprezenta husi Diretór Jerál balu hodi partisipa iha serimónia aniversáriu proklamasaun independénsia ba dala 48 no mós iha Munisípiu no Postu sira, depois atividade hasa’e Bandeira ne’e hotu, kontinua kedas ho tomada de pose.
“Iha nasionál nian maka hasa’e Bandeira ne’e hotu, Governu sei halo kondekorasaun tuir ajenda ne’ebé iha, kona-ba tomada dé pose ba Xefe Suku sira sei la konsentra iha fatin ida, maibé sei hala’o iha kada postu administrativu,” dehan Vise Ministru Administrasaun Estatal (MAE), Jacinto Rigoberto ba jornalista iha salaun enkontru MAE, Kaikoli, Tersa 21/11/2023.
Jacinto haktuir, taxa partisipasaun iha Eleisaun Orgaun Suku primeiru volta no segundu volta hanesan baibain la menus liu no la 100%, maibé atinji hela espetativa ne’ebé governu hakarak.
“Eleisaun Prezidensiál mós atinji ba 80%, eleisaun Parlamentár mós hanesan ne’ebé iha taxa partisipasaun eleisaun Orgaun Suku nian mós hanesan, ne’e duni ita bele dehan katak maioria, taxa partisipasaun ne’e di’ak,” nia hakotu.
Jornalista : Mariano Do Santos Abi
Editór : Orlando Magno
