(DILI) Mudansa – Preparasaun Atleta husi Federasaun Boxing Timor Leste atu ba tuir kompetisaun Iha SEA Games Cambodia tinan ne’e, agora dadaun Atinje ona porsentu 75.
“Konaba boksista sira agora ne’e sira nia preparasaun tama ba fulan 3 ona durante ami fó treinamentu ona husi janeiru agora atu tama fulan tolu ona sira nia prepara di’ak no agora sira atinji ona 75%,” dehan Treindor Boxing, Abilio Orlando ba jornalista iha Benfika, Colmera, Dili, segunda 28/02/2023.
Nia dehan totál Boxista ne’ebé mak naran submete ona hamutuk na’in neen akompaña Ofisial na’in ida no Treinador na’in ida.
Nia akresenta, molok atu tama kompetisaun, ne’e Federasaun iha planu dadaun ne’e mós iha komité ida husi Australia kona-ba eventu King of the Ring iha Sydney Australia.
“Ami mós prepara nafatin oinsá bele tuir kompetisaun hanesan iha Australia ne’ebá no mos ami bele tuir tan Try out dala ida ba iha Indonezia Kupang,” katak nia.
Nia informa, agora dadaun atleta sira nia kondisaun di’ak hela maibé SEJD no CDTL planu hela atu tau sira iha Kazerna iha Polisia Militar.
“Ba Sea Games tinan ne’e ita iha esperansa hanesan tinan kotuk ita-nia Boxista nasionál Delio Mouzinho hetan Silver, no agora dadaun ne’e ho estrutura Treinador servisu hamutuk oinsá para mantein ou bele liu tan, Enkuantu atleta na’in 6 neen sei joga iha klase , 51 kg, 54 kg, 57 kg, 60 kg, 64 kg no 71 kg,” nia akresenta.
Iha fatin hanesan Atleta Nasional Boxing, Delio Mouzinho informa, durante sira nia preparasaun ba fulan 3 ne’e atu prepara an di’ak liu tan.
“Uluk mak ha’u la iha koñesimentu maibé agora ha’u iha ona koñesimentu ne’ebé di’ak liu tan ha’u fiar katak ha’u sei ba kompete iha Cambodia hodi hatudu rezultadu ne’ebé di’ak,” tenik nia.
Sorin seluk Atleta Nasional Boxing, Edgar Dias Quintas hatutan agora dadaun sira hala’o preparasaun atu tama ona ba fulan 3, no treinamentu durante ne’e kuaze hetan fíziku ne’ebé di’ak.
“Esperansa ne’e depende hotu ba ami nia trenu, maibe ami atleta nain 6 iha esperansa bo’ot tebes atu bele kontribui medalia mai ami nia nasaun ida nee,” nia hakotu.
Jornalilsta : Esperansa Monteiro
Editor : Orlando Magno
