(Vikeke) Mudansa – Xefe Suku Makadike Postu Administrativu Uatulari Munisípiu Vikeke, Afonso dos Reis informa, nia parte haruka ona lista reklamasaun hamutuk 89 ne’ebé seidauk simu subsídiu fin du anu ho montante $200.00 ba Administrasaun Munisípiu Vikeke (AMV) atu bele enkamiña ba governu sentrál hodi buka solusaun.
“Ami haruka ona lista reklamante 89, ba administrasaun Munisípiu Vikeke depois sei to’o iha nasionál atu prevee duni ami-nia lista reklamasaun ne’e, nune’e ami-nia pagamentu bele la’o loos,” dehan Xefe Suku Makadike Afonson dos Reis ba Media Mudansa liu husi via telefone, kuarta 25/1/2023.
Afonso afirma, nia dúvida tanba lista pagamentu ne’ebé entrega husi governu, ne’e la’os foun maibé ida-ne’e lista tuan ne’ebé uluk uza ba pagamentu subsídiu $.200 COVID-19 iha tinan 2020.
“Ami haree fali lista ne’e la loos, inválidu tanba sira kaer de’it lista ida uluk nafatin mais ami-nia lista foun ida ami haruka ba ne’e laiha,” Nia deklara.
Ho nune’e, Xefe Suku Makadike husu ba governu atu konsidera lista reklamasaun husi Xefe família 89 ne’e dadaun la hetan diretu ba subsídiu fin do nu 2022.
Entretantu, pagamentu subsídiu fin du anu 2022 ho montante $.200 ne’e konsege atribui ba Xefe Familia iha Suku Makadike hamutuk 1.800, no mós osan ne’ebé devolve fali ba kofre estadu ne’e hamutuk $17.600.
Jornalista : Ekipa Média Mudansa
Editór : Orlando Magno
