(Dili), Mudansa – Empreza Ai-Manas DAF ne’ebé harii husi Timor oan ida ho naran David Maria Fernandes Perreira iha ne’ebé hahú ho osan dolar 20 ikus mai David konsege sosa rai, sosa motorizada no mós fó servisu ba joven balu iha ninia kompañia.
Na’in ba Ai-manas DAF, David Maria Fernandes Pereira informa, Negosiu ai-manas DAf hahú ho osan $.20.00, impresta ema nia blender, motorizada no mós la iha traballadór ajuda nia. Entaun Momentu ne’ebá seidauk iha merkadu fixu, maibé agora hatudu ona rezultadu loke kampu servisu ba joven balu.
David esplika, Ai-manas DAF nu’udar produtu lokál ne’ebé nia rasik prodús, iha tinan 2016 liu ba, iha Dili, ho objetivu kria kampu servisu ba nia an no joven sira atu sai empreza ki’ik ida hodi tau matan, Durante tinan 5 ezisténsia Ai-manas DAF konsege ona benefísiu ema lubun, hahú hosi To’os na’in, vendedór(a) inklui ninia trabalhadóres okazionais ne’ebé maioria estudante.
“Daudaun ne’e ami iha ona merkadu permanente/parseiru lima, traballadór na’in 8, totál fundus ne’ebé ami hetan konsege uza hodi harii edifísiu ki’ik ida, sosa motorizada rua, sosa rai ho medida 12×5 metru no ekipamentus serbisu nian,” dehan Nain ba Ai-manas DAF David ba Jornalista média Mudansa iha nia knaar Fatin Fatuhada Dili, kinta (17/06/2022).
Nia konta, antes ne’e David serbisu iha kompañia rua molok hahú halo negósiu Ai-manas DAF hodi distribui ba lojas sira iha Dili laran, kompañia primeiru ladún valoriza traballadór no kompañia segundu hasai David hosi serbisu la iha razaun.
“Ho situasaun ida ne’e maka ha’u hahú halo Negosiu tanba mindset ne’ebé ha’u rasik iha katak, Ha’u mós ema ida, ne’ebé iha hanoin no iha abilidade uitoan tansá ha’u la harii rasik kompañia hodi fo serbisu mai an duke ha’u serbisu ba ema hodi sai nafatin ema ne’ebé dependente,” nia relata.
Na’in ba Ai-Manas DAF Davir realsa, Iha negósiu difikuldade nu’udar solusaun ba problema ne’ebé subar an hela, tanba hosi difikuldade barak halo ema aprende barak oinsá atu solusiona problema ne’ebé iha. hasoru problema barak ne’e buat di’ak ida tanba bele halo ema sai matenek oinsá buka solusaun.
“Ita labele hakiduk bainhira hasoru problema tanba hosi problema ne’e nia kotuk sempre iha buat di’ak ida hein hela ita, Ne’e duni ha’u hakarak hatete hakarak sai emprezáriu tenke barani hasoru dezafius saida de’it, Sai emprezáriu mak la prontu hasoru problema ne’e, ema negosiante baibain mós di’ak liu.
Na’in ba Ai manas DAF ne’e realsa, agora sira serbisu makas, la haree ba loron ho kalan, dala barak David hala’o serbisu To’o tuku 2 madrugada hodi prepara Ai-manas distribui ba merkadu, bainhira halo serbisu di’ak bele muda buat ida maski neineik, duke tuur ko’alia barak hakfodak kalan.
“Ha’u deside ona ho forsa ne’ebé ami iha, atu aumenta tan merkadu permanente ba 10. nune’e bele hasa’e tan númeru ba produsaun ai manas nian, tanba, ha’u prepara ona rai iha Manufahi, kuda tan produtus esensiais ne’ebé hodi bele fasilita bainhira merkadu presiza,” David esklarese.
David hatete, Kompaña Ai-manas DAF rejistu ona iha Server maibé seidauk envolve an iha kréditu saida de’it, tanba, sira seidauk hanoin To’o iha ne’ebá, importante sai emprezáriu labele asal jadi ne’e sala, maibé tenke haree, observa no tetu molok la’o.
“Nu’udar kompañia ki’ik, hanesan foin sa’e ida hakarak haTo’o ba kolega sira ne’ebé iha mehi hakarak sai emprezáriu Labele ta’uk atu hahú hosi zero, maibé buka meius oinsá atu hahú hosi zero bele sa’e 1 To’o 100. hakarak sai emprezáriu labele moe tenke barani, nune’e moe labele falun metin O,” nia hakotu.
Jornalista : Orlando Magno
Editór : Felisberto F. da Costa
