(Dili), Mudansa-Direktór empreza TETÓN’S kafé dalan ninin, Gevanio José Goncalves infórma, bainhira atu realiza mehi labele toba demais, hader bo’ok aan no esfórsu ba objetivu saida mak hakarak realiza iha futuru.
“Joven Timoroan sira hader ona labele tóba demais, ita koko halo buat seluk ne’ebé fó benefisiu ba ita nia aan nomós ba ema seluk, lalika tóba demais se la’e mehi ne’ebé ita iha sei la realija,” dehan Diretór Gevanio ba mudansa.infó iha nia kna’ar fatin Vila-verde dili, kinta (sesta, 17/06/2022).
Diretór TETÓN’S Gevanio konta, planu hari’i Tetón’s kafé dalan ninin ne’e kleur, antes covid-19, maibé altura ne’ebá sira seidauk iha lukru, maibé Gevanio ho nia kolega investe osan no mós impresta (kredit), entaun iha tinan 2020 sira hahu loke Tetón’s kafe dalan ninin.
Nia esplika, Gevanio ho kolega na’in rua investe ho osan montante dolares rihun lima, hodi halo uma, sosa jelera no nesesidade báziku ne’ebé sira presiza atu loke bisnis.
“Ha’u nia kolega Levi ema konseptór di’ak konaba bisnis komersiu iha india, ha’u eskola ekonomi devolopment iha Bali, entaun ida ne’e inspira mai ami atu kria ami nia produtu rasik núne’e ema seluk bele mai sosa,” Gevanio relata.
Gevanio realsa, maske seida’uk esperensia ba iha terenu maibé sira koko kria kampu traballu rasik, tanba ida ne’e sira planu kle’ur ona, to’o ikus realiza duni sira nia planu.
“Agora dadauk Long Blak coffe, no mós Beef Burger uza produtu lokál hanesan, Alfase ami transfórma uituan ba hahan semi modernu Beef Burger, Beef Steak ho jus Abokate, banana mutin, no ami nia produsaun ne’e maioria produtu lokál Timor nian,” nia esklarese.
Nia afirma, produtu lokál hirak ne’e fólin lahanesan tanba banana mutin sira sosa hudi boot ho fóli $. 2.00/2.50, sira halo ida ne’e bele hetan $ 25.00, Hanesan jus abokate bai-bain fatin tólu presu $5.00 sira bele hetan to’o dolares 50, no naan kilo ida sira hetan to’o $ 35.00 ou $ 40.00, maibé gastus ba naan lokál kilo ida $ 9.00 depois tenki dulas ka blender fali.
Nia realsa, Kolega ida tama ajuda sira na’in rua Levi, tanba nia enjenaria eletrika, entaun presija ajuda buat balun tanba nia mós ema ho hanoin ne’ebé di’ak, dadaun ne’e pesoal ne’ebe servisu iha empreza Tetón’s hamutuk na’in 8 inklui Gevanio ho Levi.
“Iha ami nia fatin, loke husi oras tuku 11:00 dader to’o tuku 11:00 kalan, maibé ami fahe, na’in 3 servisu dader no na’in 3 seluk servisu lorokraik, ba sira na’in neen kada fulan ami fó $ 100.00 no meudia ho kalan sira han iha ne’e maibé ami sei hasa’e sira nia salariu liu standard SEFÓPE maibé dadaun ne’e sira sei masa percobaan,” nia deklara.
Nia hatete, difikuldade ne’ebé durante ne’e sira hasoru mak, liis bombae, ne’ebé susar atu hetan no produtu lokál balun mai ho nia tempu, hanesan avokate no ai-han lokál seluk maibé sira nafatin buka fali meius seluk hodi loke nafatin bisnis.
“Planu ba oin Ami hanoin ona atu loke tan, Teton’s iha fatin seluk, primeiru iha Bidau, segundu Fatuhada ba Komoro, terseiru iha Bekora tuir mai ami atu halo mós iha munisípiu hotu-hotu, inklui Raeoa, ho Atauru,” nia hakotu
Jornalista : Azelio da Cruz
Editór : Orlando Magno
