Negosiu Nelita Rejenera Hosi nia Inan

banner 120x600

(Likisa), Mudansa- Nain ba Kios Louvadeus, Nelita Silva de Jesus hahu haksoit ba mundu negosiu bainhira sei eskola sekundariu Santa Madalena Canosa Dili tinan 2012, iha momentu ne’eba nia inan rasik entrega kios ki’ik ida ba nia no ohin loron planu loke tan kafe ho naran Talo Coffe.

Nelita silva hanesan oan ikun. Iha familia nia laran sira hamutuk nain haat mesak feto hotu. Nia konta negosiu ne’e hahu hosi nia inan, no ema ne’ebé motiva nia dahuluk hodi hili vida negosiu mak nia inan rasik.

Iha 2013 nia remata nia estudu iha segundariu nia kotinua ba univestidade. Nia hahu nia univeridade iha Universidade da Paz (UNPAZ), Fakuldade Siensia Sosiais Humanu CSH, Departamentu Relasaun Internasionál no remata iha tinan 2016.

Hakat dahuluk ba negosiu hahu ho kios ki’ik ho nia dezafiu oioin maibé tenke kontinua tanba nesesidade eskola no família. Keos ne’e mak dadaun ne’e hanaran Louva Deus, lokaliza iha munisípiu Likisa. Iha kios ne’e fa’an produtu sira mak hanesan Paun, Dosi, Jus, Es buah, Boba inklui fa’an nesesidade báziku sira seluk.

“Hosi kios ne’e ha’u dezenvolve to’o hatama rendimentu dollares amerikanu $ 2,000 iha banku dadaun ne’e,” Nelita Silva de Jesus konta ba Jornalista Media Mudansa.info via WhatsApp foin lalais ne’e.

Iha Kios Louva Deus ne’e, sira mós oferese jus oin-oin no Es buah ho folin dollares amerikanu $ 1.00 to’o $ 2.50 centavu .

“Planu ba oin sei loke tan kafétaria ida ho naran Talo Coffe shop, sei investe mós iha  negosiu  hakiak manu rade,” konta nia

Nia esplika, Dala ruma kliente barak hakarak ba tur iha sira nia fatin hodi joga (enjoy) bebidas hanesan jus no es buah, maibé fatin la sufiesiente atu ema bele tur barak.

Tanba ne’e kliente sira sujere loke tan fatin halo luan atu nune’e ba kliente tur hodi hemu bebidas ne’e sira sasa.

Difikuldade seluk ne’ebé mak Nelita hasoru iha negosiu nian mak hanesan manajementu ba osan sei sai problema, tanba dala barak osan ne’ebé tama no sai seida’uk atu hatene lolós ninia objetivu. Maske hanesan ne’e maibé sira nafatin hakat ba oin.

“Dadaun ne’e iha staff feto ida maka servisu, no planu ba oin sei presija tan ema atu servisu hamutuk. Salariu ba traballador fulan ida selu  150.00 dolar, karik hare ba nia progressu servisu la’o di’ak, sei hasa’e tan salariu.” Nia akresenta.

Ema hatene sira nia negosiu tanba sira halo promósaun liuhusi media sosial sira hanesan facebook no WhatsApp, dadaun ne’e ema barak mak koiñese fatin ne’e hodi ba sosa sira nia produtu.” Nia deklara.

Nelita rekomenda ba parte relevante sira hanesan Ministeriu Turismu Komersiu No Industria (MTKI), Minsiterio Obrás Públika (MOP) hodi bele hare situasaun negosiu iha rai laran inkluí mós hare ba dezenvolvimentu infrasestrutura bazikú, hodi negosiante sira bele dezenlvolve produtu iha rai laran hodi kompete iha merkadu.

Jornalista         :Manuel Andrade

Editór              : Felisberto F. da Costa

banner 325x300