(Díli), Pantai Kelapa, 08/10/2026 – Bainhira loron naroman, Filipe Pereira sai hanesan estudante universitáriu sira seluk. Livru no atividade kampus sai parte husi nia rotina loron-loron. Maibé, bainhira kalan monu, nia troka livru ho sigaru no pulsa, tuur iha estrada ninin atu buka osan hodi sustenta nia nesesidade loron-loron no kontinua nia estudu.
Filipe, estudante Departamentu Engenharia Industrial iha Universidade Da Paz, komesa fa’an sigaru iha fulan Marsu 2026. Ba nia, atividade ne’e sai fonte rendimentu ida ne’ebé bele ajuda nia jere tempu entre estudu no buka osan.
“Ha’u senti fa’an iha dalan ninin ne’e fasil liu atu hetan osan lalais no ha’u bele jere ha’u nia tempu. Ha’u hili fa’an iha tempu kalan tanba hanesan estudante, loron tenke ba kampus,” hatete Filipe Pereira iha Pantai Kelapa, 08/10/2026.
Filipe normalmenti komesa nia atividade fa’an sigaru iha tuku 19:00 no kontinua to’o tuku 23:30 ka 00:00. Oras servisu ne’e permite nia kontinua ba aula durante loron, maibé iha tempu hanesan ne’e mós halo nia enfrenta dezafiu ba nia estudu.
Kalan servisu to’o tarde halo nia dala ruma sente kolen no la iha tempu toba naton. Maibé, Filipe dehan nia sei esforsu nafatin atu kontinua nia estudu tanba nia rasik mak hili dalan ne’e hodi bele sustenta nia moris.
“Ha’u sente kolen no difisil uitoan, tanba kalan toba tarde no isin kolen, maibé ha’u esforsu nafatin atu kontinua ba eskola tanba ha’u mak hili dalan no prosesu ida ne’e,” nia hateten.
Aleinde problema fahe tempu entre servisu no estudu, Filipe mós hasoru risku bainhira fa’an iha estrada ninin durante kalan. Trafiku ne’ebé aumenta iha kalan, inklui ema sira ne’ebé lori transporte no dala ruma la tuir regra konduza, sai hanesan ameasa ba nia seguransa.
Maski enfrenta situasaun ne’ebé la fasil, Filipe la abandona nia estudu. Ba nia, edukasaun nafatin sai dalan importante ida atu loke oportunidade ba moris diak iha futuru.
Nia iha esperansa atu remata universidade no hetan servisu ne’ebé di’ak liu, hodi bele ajuda nia família no, iha futuru, la presiza depende tan ba fa’an iha estrada ninin durante kalan.
“Ha’u iha esperansa bo’ot atu remata ha’u nia estudu iha universitariu no iha futuru hetan servisu ne’ebé diak liu atu ajuda família, no la presiza fa’an tan iha estrada ninin kalan-kalan hanesan agora,” nia hatutan.
Istória Filipe hatudu realidade estudante balun iha Timor-Leste ne’ebé tenke fahe tempu entre edukasaun no buka sustento. Entre livru durante loron no sigaru durante kalan, nia kontinua lao ho esperansa ida: remata estudu, hetan oportunidade servisu ne’ebé diak liu, no bele harii futuru ida ne’ebé seguru ba nia no nia família.
Jornalista: Indária
Editor: Ana Maria da Silva
