(Díli) Kintal Bo’ot- Relasiona ho aktu ne’ebé oknum estudante balun halo hasoru jornalista ne’ebé hala’o kna’ar atu halo kobertura ba konferensia imprensa relasiona ho asuntu asediu seksuál ne’ebé envolve pesoál dosente ida iha Universidade Díli (UNDIL), tanba ne’e, Konsellu Imprensa husu públiku atu respeita kna’ar mídia no jornalista.
Prezidente Konsellu Imprensa, António M.D. Cesar Moniz Mali, hatete, relasiona ho Ofensa Intergridade Fízika hasoru jornalsita iha Universidade Díli (UNDIL), Konsellu Imprensa espresa preokupasaun no lamentasaun profunda ba insidente ne’ebé akontese iha resintu UNDIL hasoru jornalista ne’ebé hala’o kna’ar atu halo kobertura ba konferénsia imprensa relasiona ho asuntu sensitivu balu ne’ebé alegadamente envolve pesoál dosente ida iha Universidade Díli.
“Hakarak hato’o ba públiku katak mídia nu’udar pilar daha’at ne’ebé kontribui ba haburas demokrasia hodi promove transparénsia, defende lia-loos, justisa no sai lian ba ema lian laek sira, nune’e, husu ba públiku atu respeita kna’ar mídia no jornalista nian hodi kria ambiente ne’ebé livre no seguru atu mídia bele hala’o sira nia funsaun ho di’ak hodi bele serbi públiku ho informasaun ne’ebé loos no kredivel”, dehan Prezidente Konsellu Imprensa, António M. D. Cesar Moniz Mali, iha Kintal Boot, Kinta, 23/10/2025
Prezidente ne’e hatutan, hahalok impede kna’ar jornalista nian la’os de’it viola Liberdade Imprensa no Liberdade Espresaun maibé mós viola públiku nia direitu atu hetan informasaun, direitu ne’ebé konsagra iha konstituisaun RDTL.
Nia subliña, dala ida tan, Konsellu Imprensa espresa lamentasaun ne’ebé kle’an ba aktu ofensa intergridade fízika simples hodi impede ona jornalista sira ezerse sira nia funsaun iha espasu públiku.
“Apela ba instituisaun Ensinu Superiór no institusaun hotu-hotu atu garante espasu ne’ebé seguru no livre atu jornalista sira bele ezerse sira nia funsaun ho livre”, nia apela.
Nune’e Konsellu Imprensa mós enkoraja jornalista no mídia sira hotu atu kontinua hala’o kna’ar ho profisionál, nakonu ho responsabilidade tuir Kódigu Étika Jornalista nian no apela mós ba Orgaun Komunikasaun Sosiál sira wainhira emprega pesoál ruma sai jornalista iha sira nia mídia minimu tenke iha kartaun estajiariu atu asegura jornalista sira nia direitu wainhira ezerse funsaun jornalístika nian iha terreinu.
“Reafirma kompromisu Konsellu Imprensa nian atu kontinua defende Liberdade Imprensa, Liberdade Espresaun hodi garante públiku asesu ba informasaun ne’ebé kredivel no firmi defende mídia no jornalista iha situasaun ameasa nia laran”, nia afirma.
Iha fatin hanesan, Diretór Diresaun Análiza no Dezenvolvimentu Mídia (DADM), Alberico da Costa Junior, hatete, agresaun fízika ou violénsia hasoru jornalista, aktu sira ne’e Konsellu Imprensa kondena.
“Agresaun fíziku, violénsia hasoru jornalista no impedimentu ba atividade jornalízmu nian ne’e Konsellu Imprensa nia pozisaun klaru katak kondena, iha país demokrátiku oinsá ita atu garante liberdade imprensa ne’ebé di’ak para ita nia sidadaun sira bele asesu informasaun ida ho lolos”, tenik diretór
Tanba ne’e, Konsellu Imprensa mós espera insidente refere sei la akontese tan iha loron oin mai.
Jornalista: Sandi Belo
Editora: Quisânia Gleide
