(Dili) Mudansa – Ministru Turizmu, Komérsiu no Indústria (MTCI, sigla portugés) José Lucas do Carmo da Silva deklara, merkadu globál sei la para iha ne’e maski ohin halo enseramentu ba feira ne’ebé promove produtu lokál
maski feira nasionál promosaun produtu lokál dadaun ne’e remata ona maibé misaun halo promosaun no marketing produtu Lokal no Nasional Timor-Leste ba merkadu globál tenke kontinua.
“Feira Nasional ne’e ensera ohin, maibé misaun halo promosaun no marketing produtu Lokal no Nasional Timor-Leste ba merkadu globál tenke kontinua eziste,”dehan Ministru José liuhusi nia diskursu iha ámbitu serimónia ensera feira nasionál iha portu Dili, 20/01/2023.
Ministru informa, Timoroan hotu-hotu tenke uza didi’ak média teknolojia sira ne’ebé iha atu promove Timor-Leste sai nu’udar destinu turístiku úniku ne’ebé iha inkluzivu, sustentavel no responsavel, iha dame nia laran, hodi halo dezenvolvimentu, kria kampu servisu lori rendimentu ka benefísiu sosiál, kulturál no ekonómiku ba bem komún povu nian.
José Lucas mós lori governu da ualu nia naran hato’o agradese, tanba feira nasionál ne’ebé organiza husi MTCI durante loron 30 iha portu Dili, konsege Rejista instituisaun públika, privada no emprendedór negosiante mikro pekena no média empreza, ne’ebé partisipa iha feira nasionál hamutuk grupu 95 ne’ebé kompostu husi, Instituisaun Governu 28, setór Privadu 5, Artezenatu 32 no parte Hahan no Bebidas hamutuk 30.
“Bazeia ba dadus observasaun ne’e, iha mós feedback husi grupu partisipante feira sira refere hatudu katak feira ida-ne’e fó oportunidade ba instituisaun Governu, setór privadu, emprendedór sira husi mikro pekena no média empreza sira bele partisipa hodi hatudu sira-nia rezultadu servisu,” nia salienta.
Nia realsa, grupu sira ne’ebé partisipa iha feira ne’e sira-nia kualidade mós kompetitivu tebes no mós iha Observasaun husi Grupu treinamentu, Artista Kantores, Banda Múzika, Modelu no Fashion Show sira espresa sentimentu kontente tebes tanba sira bele hetan oportunidade hodi aprezenta sira-nia kompeténsia koñesimentu, abilidade no profisionalizmu, iha arte kreativu no inovativu husi arte kultura tradisionál, kontemporania no modernu.
Durante iha periode feira nasionál ida-ne’e komisaun organizadóra fó mós oportunidade ba juventude feto no mane aprezenta sira-nia abilidade no talentu iha ospitalidade, astronomia, bebidas ne’ebé sira konsege hatudu sira-nia kualidade di’ak tebes ih kompetisaun.
“Nune’e mós sira espresa sira-nia sentimentu orgullu tanba foin primeira vés governu liuhusi MTCI halo eventu ida ke di’ak tebes e sira espera katak eventu hanesan ne’e, bele kontinua hala’o iha fim de semana,”nia informa.
Ministru mós enkoraja nafatin ba Unidade Téknika Interministerial sira hamutuk ho setór Privadu no emprendedór sira atu tau esforsu hamutuk hodi halo avaliasaun ba Feira Nasionál ne’e, no bele prepara fali planu ba oin hodi organiza Eventu Nasionál no Internasionál seluk di’ak liután, hanesan Expo Timor-Leste hodi konvida mós partisipasaun Belum Nasaun sira seluk liuhusi reprezentante Embaixada ne’ebé iha Timor-Leste.
“Atu-bele partisipa iha Expozisaun hirak ne’ebé sei prepara ho vizaun, misaun no objetivu fahe koñesimentu, esperiénsia, teknolojia, promove edukasaun, inovasaun no kooperasaun entre parte tantu aprezentadór ho vizitante no vendedór ho kompradór sira,”haktuir nia.
Entretantu tuir dadus vizitante iha Feira Nasionál ne’e, segunda-feira to’o Kinta-Feira kuaze kalan-kalan ema mai vizita stand ne’ebé iha pur volta 1.000, inklui kada semana, iha sesta-feira, sábadu no domingu, ema mai vizita iha férias ne’e kuaze atinji 2.000 to’o 3.000 enkuantu Ho sumatóriu to’o fulan ida, konsege atinji númeru vizitante hamutuk 30.000 to’o 45.000.
Jornalista : Ekipa Media Mudansa
Editór : Orlando Magno