(Díli) Merkadu Taibessi – Negosiante José de Araújo Martins hanesan joven ne’ebé dadaun ne’e halao hela nia negosiu fa’an sapatu, xinelus, pasta no sasan sira seluk, enkuantu joven ne’e lakohi moris depedensia ba nia família uma laran hanesan inan, aman no maun alin sira, maibe hakarak buka rasik osan hodi apoiu nia kursu ne’ebe mak nia halao hela.
Hafoin intervista negosiante ne’e hatete, nia rasik iha ona planu ba tinan oin atu kontinua fila fali eskola ne’ebe mak paradu ona, no liuhusi negosiu ne’ebe maka nia halo husi nia ideia rasik ho rasaun atu bele moris mesak no la depende ba inan ho aman maske sira nia kolen selu labele.
“ Ha’u fa’an sasan ne’e tanba atu kontinua eskola iha tinan oin, nune’e ha’u foti desizaun buka osan antes wainhira atu kontinua eskola labele husu ba apa ho ama ”, Dehan Negosiante José de Araoju Martins ba jornalista Média Mudansa iha Merkadu Taibesi foin lalais ne’e.
Negosiante José informa tan katak moris la permanente atu husu deit ba ema seluk, maibe moris presija sai dependente hodi bele buka solusaun ba moris, maske iha maun ho alin maibe hotu-hotu presija tuir tempu, koko ho kosar be’en hafoin bele hetan ho nia resultadu.
” Ha’u hakarak fa’an sasan tanba koko atu buka moris mesak no lakohi sai depedensia ba ema seluk, tanba moris la permanente ho ema ida nia ajuda “ nia deklara.
José Subliña, sasan ne’ebe mak nia fa’an la bo’ot liu hanesan ema seluk nian maibe nia koko fa’an husi Sapatu, Xinelus, Pasta no asesores sira ne’ebe ema uza, hafoin tula ba iha karosa (Gerobak) dudu husi uma no mai rai iha merkadu Taibesse.
“Ha’u sosa sasan hirak ne’e iha loja xineza sira ho folin dollares amerikanu Lima nulul ($50) bele mós to’o doolares amerikanu atus ida ($100) no ha’u fa’an fali sinelus ida dolares amerikanu ida ($1,50) sentavus lima nulu no rendementu kada loron ha’u bele hetan dolares amerikanu Tolu nulu ($30) ou dolares amerikanu hat-nulu ($40) dólar hanesan ne’e”, nia subliña.
Nune’e nia relata, benefisiu ne’ebé nia hetan negosiu ne’ebe nia halao maka hodi bele atende fila fali nia nesesidade loro-loron nian hanesan selu kursu no selu bemo, enkuantu desafio no obstakulu ne’ebe negosiante ne’e hasoru hanesan dalaruma hetan duni husi ekipa Guarda Munisípiu tanba okupa espasu públiku iha merkadu.
“Dezafiu ne’ebé ha’u hasoru mak hanesan hetan guarda munisípiu mai duni ha’u no foti sasan ba soe tanba de’it okupa fatin espasu públiku, maibé hirak ne’e la sai bareira ba ha’u nia mehi”, haktuir nia
Nia hatutan, ba futuru sei kontinua nafatin negosiu ne’e tanba liu husi aktividade negosiu hodi bele atende ba nesesidade moris loro-loron nian maske la barak maibe nafatin esforsu ho mak sei sai bo’ot iha futuru aban bainrua.
Negosiante ne’e mós husu ba joven sira atu hanoin ba futuru ho buat ne’ebe mak importante, no desenvolve ideia kreativu sira sai negosiu hodi bele hetan osan, tamba dalan atu sucessu tenki liuhusi esforsu ho nune’e bele atinji ita nia objetivu.
“Maluk joven sira tenki tau ona ita nia hanoin ba buat ne’ebé importante, mak hanesan aprende iha buat barak hodi halo negosiu liu husi buat ki’ik, tanba buat ki’ik ne’e mak lori ita atu susesu lalais no iha dalan ida ne’ebé importante mak labele moe, se bainhira ita moe mak ita nia moris sei la susesu” Nia hakotu.
Ekipa Kobertura
Editora :Gaudencia Belo
