(Dili) Mudansa – Nu’udar Foin-sa’e ida tenke halo buat di’ak ho pasiensia ba ida-idak nia an liu husi hanoin kreativu no inovativu oinsá bele kontribui ba dezenvolvimentu liuliu indústria iha nasaun Republika Demokratika Timor-Leste (RDTL).
Domingos Baltazar hato’o asuntu ne’e ba jornalista média Mundansa bainhira partisipa Feira Emprendedorismu Foinsa’e 2023 iha Timor plaza durante loron tolu iha ne’ebé aproveita promove produtu ne’ebé nia ho ekipa prodús antes tiha ona iha sira nia fatin.
“Halo buat sira ne’e, presiza ita-nia pasiénsia, kalma karik sente baruk deskansa uitoan depois kontinua fali tanba buat hotu atu di’ak presiza prosesu naruk no ha’u la’ós ema kreativu maibé koko halo buat di’ak ba ita-nia an nune’e bele sai ema kreativu,” dehan Domingos ba jornalista Média Mudansa iha TimorPlaza Dili, kinta 19/10/2023.
Iha ne’ebé, Domingos Baltazar apresia ba parte relevante sira liu liu ministériu Komércio Indústria (MCI) tanba bele fó ona espasu ba grupu Flowers Are Made From Coconout Shells (FAMFCS) hodi partisipa iha feira Emprendedorizmu Foin-sa’e 2023 durante loron tolu iha Timor Plaza.
“Pessoalmente ha’u kontente tebes no agradese ba parte relevante sira ne’ebé konvida ona ami atu mai promove liu tan ami nia produtu no kreatividade nuu kakuun ne’ebé halo ai-funan,” nia relata.
Grupu FAMFCS harii iha tinan 2020 agora daudaun fó ona servisu ba ema na’in 6 kompostu husi feto 2 no mane 4 no lokaliza iha Pante Makasar Rejiaun Administrativu Espesiál Oekusi Ambeno (RAEOA) ho nia atividade prinsipál mak transforma nuu kakuun sai eskulptura ne’ebé furak.
Kona ba rendimentu depende ba ema sosa husi Dili ema na’in haat mak sosa ona no komunidade sira husi Oekusi mós barak mak sosa balun pesan depois ami halo hotu mak sira na’in rasik mai foti de’it sira pesan mós tuir nia hakarak mak hafoin ami halo tuir sira nia modelu maibé ho nia presu ne’ebé mak la hanesan.
Nia husi ba joven sira labele baruk no labele moe hodi halo kualkér atividade ne’ebé mak iha, imi-nia talentu ne’ebé mak iha hatudu de’it importante mak labele moe maibé hatudu pasiénsia hodi bele realiza atividade sira ne’ebé mak halo ne’e loron ida sei susesu iha moris.
Iha fatin hanesan Memru Grupu FAMFCS Agustina da Cruz haktuir materiál sira ne’ebé mak grupu refere presiza hodi halo atividade mak hanesan gurinda ai, nuu kulit, bor, metru hodi sukat, halus pinsél, bernis ho kores no materiál refere apoiu husi UNDP hodi promove grupu ne’e nia produtu sira.
“Promove ami nia kreativu ne’e, tanba UNDP oferese materiál ukir, gurinda, amplo, kompresór no limar hodi halo ba ami nia kreativu,” Nia Hakotu
Jornalista : Domingas Viana
Editór : Orlando Magno
