(Dili) Mudansa – Anita Fernandes hanesan joven feto ida ne’ebé matenek no iha hanoin di’ak hodi kria rasik kampu servisu ba nia an liu husi loke salon make-up ne’ebé aprende husi média sosiál liuliu iha youtube.
“Hau loke Salon iha tinan 2019 até agora, primeiru ha’u sosa uluk pulsa depois nonton make-up iha youtube depois koko make-up iha uma de’it, entaun ema barak dehan ita-nia rezultadu make-up di’ak loos nu’usá ita la loke salon nune’e ema bele hatene,” dehan Anita ba média mudansa iha Kampung merdeka Dili foin lalais.
Nia konta, esperensia ne’ebé nia iha la’ós de’it husi Youtube maibé ninia kolega nia mama ne’ebé Makeup ema, husi ida ne’e Anita mós iha hanoin hakarak atu koko Makeup entaun hahú husi ne’e nia sempre rona motiva no suporta sira husi família no mós husi kliente sira.
“Hau komesa hahú loke salon iha ami nia uma oin, kona ba sasán sira ne’ebé ha’u uza sosa de’it iha Loja Jacinto no osan ne’ebé ha’u uza ba sosa ekipamentu ne’e hetan husi fa’an bani been no fa’an husi hirak ne’e mak ha’u kontinua loke fali salon make-up,” nia konta.
Nia haktuir, iha salon ne’e la’ós ba make-up de’it maibé iha mós pinta liman no extensia matan fulun husi hirak ne’e maka konta hamutuk kada loron Anita bele hetan dolar 300 maibé depende ba kliente sira.
“Hau make-up ema iha ne’e ho nia presu la hanesan tanba Dala ruma sira mai de’it ha’u-nia fatin dala ruma mós ha’u mak tenke ba to sira nia fatin tanba ne’e nia presu la hanesan iha festa hanesan kazamentu sira ne’e ha’u bele hetan to $.300.00 loron ida maibé loron bain bain dala ruma ha’u hetan $.200.00 se lae $.100.00 no ki’ik liu mak $.50.00,” nia relata.
nia tenik, fatin make-up ne’e Anita aluga de’it ema nia uma, maibé planu ba oin nia hakarak loke loja no hodi loke kampu servisu ba joven sira seluk.
“Dala ruma ema mane sira dehan feto labele halo buat ida maibé ha’u husu ba maluk feto sira tenke brani atu hamriik hodi hateten katak ita feto mós bele importante mak keta haluhan aprende no prátika barak,” nia hakotu.
Estajiadu/a : Isabel de Fatima/Ricardo Martins
Editór : Orlando Magno
