(Dili) Mudansa – Feto foin-sa’e Timoroan ida, iha mehi ne’ebé buras ho esperansa hakarak sai susesu iha atividade negósiu nian, tanba nia mós iha prinsípiu ida, hakarak hatutan nia moris liu husi esforsu an rasik.
Maski, mehi atu muda moris sai di’ak, ne’e fasil ba ema hotu atu halo liu husi dalan ne’ebé de’it, tanba balun iha hanoin halo negósiu ki’ik mak ba boot no balun fali hakarak hetan tiha servisu maka loke negósiu.
Tanba atu atinji mehi ne’e, presiza planu ho esforsu maka’as, no se de’it mak iha vontade di’ak, nia mak sei hetan susesu iha loron ida.
Hanesan mós Joven Elisabet Octabelina Verdial de Lima Soares nu’udar feto foin sa’e ne’ebé deside fa’an pulsa no Ice Cream, ikus mai atinji duni nia objetivu kona-ba loke kompañia.
Joven feto ne’e orijen husi Munisípiu Ainaro, maibé boot iha Dili, no nia konsege remata ona estudu iha área Geologia iha Universidade Nasionál Timor Lorosa’e (UNTL) Hera.
Octa deside hahú nia atividade negósiu ki’ik ne’e, dezde nia sei estuda iha UNTL Hera, tanba momentu ne’e, sira hela de’it Asarama, kios dook, ema baruk atu ba sosa pulsa, ho ida-ne’e mak nia hamosu ideia hodi fa’an pulsa iha Asarama.
Maibé, orsamentu ne’ebé nia uza hodi sosa pulsa ne’e empresta de’it husi ninia mama, depois momentu ne’e Octa konklui tiha nia estudu, sai husi Asarama, nia deside fa’an fali Skrim iha uma.
Inísiu loos ne’e, ha’u iha Hera, ha’u haree oportunidade iha ne’ebá ami mós hela asrama, kios dook, entaun ha’u hahú ho fa’an pulsa Maibe ha’u deve Maen Nia osan, tanba maen kaer osan arisan. depois de ha’u sai husi asrama mai fali uma kontinua fa’an ice cream, hahú ho osan $.100.00 fa’an pulsa ne’e, kontinua fali ice cream ha’u komesa sosa ona mesín balun, hanesan jeleira, blender no seluk tan,”dehan Octa ba média Mudansa iha ninia Kafetaria, Becusi-Kraik, Kuarta 15/3/2023.
Husi rezultadu negósiu ki’ik ida-ne’e, mak ohin loron Octa konsege atinji duni nia mehi atu harii kompañia, ho naran Restaurante Kafetaria, Elektronik-Geologia (RESKAF-ELGE) ne’ebé koñesidu ho kafetaria saudades.
.
Husi produtu kafé ida-ne’e ho nia menu oioin de’it maka hanesan, kafé Expresso $1.00, kafé Americano $1.00, Long Black $1.00, Cappucino $2.50, Latte $2.50, Ice coffe $1.50, Ice latte $2.50, Boba $0,50-$1.50, Jus abokate $0,50-$1.50, Jus Sabraka $0,50-$1.50, Banana smoothies $1.00, Pisang krispi $1.00, Es lumut $1.00, Es-cream $1.00, Corn dog $0,25, Chips $1.50.
Maski Kompana RESKAF rasik nia produsaun foin mak ba kafé de’it seidauk kobre hotu restorante, maibé nia nafatin iha esperansa ida katak loron ida sei loke tan restorante, tanba ne’e kompañia tau kedan naran RESKAF.
“Ho naran ne’ebé maka RESKAF ELGE , tanba mehi ne’ebé iha, ne’e ha’u-nia optimista parese loron ida ha’u sei loke restorante ho kafé, no naran RESKAF ne’e katak Restorante Kafe no ELGE ne’e Eletronik-Geologia, ha’u tau Eletronik tanba kolega ne’ebé rekomenda ha’u ba tuir kompetisaun ne’e husi eletrónika no ha’u Geologia Tanba ne’e mak ha’u tau naran RESKAF ELGE,”nia informa.
Husi inísiu kedas, Feto foin sa’e ne’e foti alternativa oioin atu hala’o atividade negósiu ki’ik tanba ho prinsípiu ida katak presiza liuhusi buat ki’ik mak foin-sa’e ba boot.
Tuir nia, durante ne’e nia mós partisipa ona iha atividade feira nasionál sira ne’ebé kria husi estadu no governu iha kapitál Dili no munisípiu sira. Aleinde ne’e, tuir mós kompetisaun Inovativu ne’ebé kria husi UNDP ho MTCI, no konsege hetan apoiu orsamentu ho montante $7.270.
Iha Fuan laran, Octa sente agradese tanba nia background hanesan ema Tékniku iha área Geologia nian maibé grasas adeus bele hetan fali susesu iha atividade negósiu inovativu.
Joven feto ne’e mós fó hanoin ba joven sira, karik bainhira iha mehi tenke mantein mós prinsípiu atu luta, no bainhira monu tenke koko hamriik hodi la’o ba oin nafatin hodi bele atinji objetivu rasik.
“Bainhira ita iha mehi lalika ta’uk bainhira monu tenke hamriik hodi la’o, no tenke firmi iha prinsípiu no labele depende de’it ba governu, bainhira iha oportunidade tenke aplika labele hein hodi oportunidade mak buka ita,”nia fo hanoin.
Jornalista : Julião da Silva / Estajiada Remigia Locatelli
Editór : Orlando Magno
