(Likisa), Maumeta 04/07/2026 – Ambitó selebrasaun Aniversariu Partidu Kmanek Haburas Unidade Nasional Timor oan(KHUNTO) ba dala 15 iha Munisipiu Likisa nakonu ho espíritu unidade no fratenizasaun ba membru sira, no realiza mos seremonia tomada de pose ba membru Joventude foun 200 hodi hametin Partidu iha baze hodi konklui ba eleisaun tuir mai.
Iha selebrasaun ne’e, Konseleiru Maximu Partidu (KHUNTO) Naimori Bucar, hato’o katak partidu polítiku sira mak atu liberta povu no nasaun maibé, tuir nia agora tempu atu fó atensaun liu ba povu sira ne’ebé sei moris iha kiak nia laran.
”Partidu hotu-hotu mai ho nia hanoin atu liberta povu no liberta nasaun agora,ita hamutuk atu liberta povu sira ne’ebé moris kiak. Labele koalia deit, maibé tenki implementa ba povu atu nune’e sira bele fiar ita no Timor-Leste bele lao ba oin. Ita tenki rona malu, fiar malu no respeita votu ne’ebé povu fó mai ita,” Diskursu lideransa maximu Partidu KHUNTO Bucar,iha likisa 04/07/2026.
Nia mós reafirma katak,lideransa tenki besik ho komunidade no komprende diretamente difikuldade sira ne’ebé povu hasoru.
”Hau mak ukun tenki hamutuk ho povu sira atu haree sira nia moris no dezafiu sira durante ne’e hau lakohi husik imi/povu moris mesak,” Nia dehan
iha fatin hanesan Prezidente Partidu (KHUNTO) Armanda Berta deklara, hotu hamutuk atu haksolok ba aniversáriu Partidu KHUNTO nia aniversáriu ba dala 15,hanesan jornada moris ida ne’ebé nakonu ho luta, sakrifísiu no dedikasaun ba nasaun.
“Hahu husi fundasaun to’o ohin loron, KHUNTO konsistente atu sai hanesan partidu ida ne’ebé hamriik iha unidade nasionál, demokrasia, justisa sosiál no bem-estar povu nian, tuir espiritu no matadalan ne’ebé Matebian sira fó sai” Nia hatutan
Nia subliña, tanba ne’e mak tema ne’ebé uza ba aniversáriu tinan ida-ne’e maka “Hanetin Unidade Nasionál ba Dezenvolve Povu nia Moris ho Di’ak.” Ho signifikadu boot tebes, tanba unidade nasionál la’ós de’it kona-ba polítika, maibé sai hanesan fundasaun prinsipál ba dezenvolvimentu nasionál.
”Karik laiha unidade, dezenvolvimentu sei lakon dalan. Karik ita la hamutuk no la servisu hamutuk, bem-estar no prosperidade sei difícil atu hetan ho loloos ba povu tomak” Nia saleinta.
Nia deklara, aniversáriu ne’e tenki sai hanesan oportunidade atu konsolida partidu liu husi prosesu hametin espiritu partidu no unidade entre membru sira hotu, no kontinua servisu ho kompromisu atu lori dezenvolvimentu no moris-di’ak ba povu no nasaun Timor-Leste.
Enkuantu Iha parte seluk, Sekretáriu Jerál Partidu (KHUNTO) Eleídio Araújo hatete, durante tinan 15 partidu kontinua hamrik metin hodi sai nu’udar fatin ida ba luta povu nian.
”Durante tinan 15 , Partidu KHUNTO hamrik metin nu’udar mahon ida ba povu nia luta, no ita hatudu ona komitmentu atu luta ba interese povu nian,” hatete Eleídio Araújo.
Nia esplika mós katak, iha progresu boot durante períodu ne’e, liuliu iha área organizasaun no rezultadu polítiku. Tuir nia, votu Partidu KHUNTO aumenta husi eleisaun tinan 2012 to’o 2026, no agora partidu iha reprezentante lima iha Parlamentu Nasionál.
”Progresu ne’ebé ita hetan durante tinan 15 mak komunikasaun diak, organizasaun forte no aumentu votu husi 2012 to’o 2026. Agora Partidu KHUNTO iha kadeira 5 iha Parlamentu Nasionál,” dehan nia.
Maski nune’e, Sekretáriu Jerál ne’e admite katak, partidu sei hasoru dezafiu, liuliu relasiona ho edifísiu permanente iha munisípiu balun.
”Munisípiu balun seidauk iha edifísiu permanente, tanba ne’e administrasaun balun seidauk lao ho diak. Maibé iha tempu badak ami sei kria edifísiu iha munisípiu hotu molok tama ba eleisaun prezidensiál 2027. Bainhira seidauk iha edifísiu permanente, ami sei kontinua arrenda uma tuir lei Komisaun Nasional Eleisaun (Sigla Portugues-CNE nian,” hatete Eleídio Araújo.
Nia aumenta tan katak, Partidu KHUNTO prepara an ba eleisaun prezidensiál, Kámara Munisipál no Parlamentár iha tinan 2027. Kona-ba kandidatu prezidensiál, partidu seidauk fó sai deklarasaun ofisiál.
”Partidu KHUNTO sei prepara ba eleisaun 2027. Kona-ba kandidatu prezidensiál, seidauk iha deklarasaun ofisiál. Bainhira Prezidente Repúblika fó anúnsiu ofisiál ba eleisaun, mak partidu sei anunsia nia kandidatu,” konklui Eleídio Araújo.
Jornalista/Estajiada: Josefina Maria freitas Desá
Editor : Ana Maria
