(Dilí) Manleuana– Mateus Aby idade 26, orijinalidade husi suku Abani, postu Pasabe,Rejiaun Adminstrativu Espesial Ambeno Oe-Cusse (RAEOA) hatudu ezemplu no sai inspirador ba espíritu forte no determinasaun iha mundu negósio.
Mateus komesa hahú negósio pentolan desde tinan 2013, iha tempu ne’ebé nia idade sei ki’ik no moris iha kondisaun ekonomia família ne’ebé limitadu. Nia relata katak motivasaun prinsipal mak ajuda sustenta família, tanba osan iha uma laran la sufisiente.
Maski seidauk remata eskola, Mateus la hakotu nia mehi. Nia deside tama ba mundu negósio ho kondisaun simples, la iha kapital. Iha tempu hahu nia negosiu, uza sistema fa’an sasan ema nian ,to’o nia bele halibur kapital rasik liu husi rezultadu fa’an loroloron.
Agora dadaun, Mateus bele hetan renda entre dolares amerikanu $30 kada loron, maski nia admite katak montante nee depende tebes ba númeru kliente sira. Osan ne’ebé nia hetan la’ós deit atu sustenta nia-an, maibé mos ajuda família sira iha foho hodi atende nesesidade loroloron.
“maske dalaruma fa’an la hotu maibe tenki pasiensia hodi fa’an nafatin,” dehan Mateus.
Nia mos hatete katak suportu husi família sai forsa boot ida ba nia atu la para no kontinua luta. Difikuldade sira la hamate nia esforsu, maibé sai hanesan motivasaun atu servisu maka’as liután.
Ba futuru, Mateus iha planu atu dezenvolve negósio seluk hodi hadi’a kondisaun moris no fó oportunidade di’ak liu ba família.
“ha’u nia planu ba futuru maka atu kontinua halo tan negosiu seluk, karik osan iha ”nia hatete
Ho moris simples iha uma laran ho membru família lima, Mateus kontinua sonha atu hetan moris ne’ebé di’ak liu liu husi esforsu rasik no dedikasaun. determinasaun no pasénsia, negósio ki’ik hanesan pentolan bele sai dalan atu sustenta família no hadi’a moris.
Jornalista/estajiadu :Moises Quefi
Editor :Manuel andrade
