Díli, Pantaikelapa, 17 Abril 2025 – Konseleiru partidu, KHUNTO, José dos Santos Naimori Bucar, husu governu atu aloka orsamentu sufisiente hodi reforsa programa Institutu Nasional de Combate ao HIV-SIDA, Institutu Públiku (sigla-INCSIDA, I.P), nune’e hodi halo prevensaun no tratamentu saúde iha munisípiu, postu administrativu no suku sira.
Konseleiru partidu, KHUNTO, José dos Santos Naimori Bucar hatete, investimentu iha setór saúde importante tebes atu asegura servisu ne’ebé diak ba komunidade, liu-liu atu prevene no kontrola transmisaun virus HIV ne’ebé númeru kontinua aas, no bele afeta ba populasaun, inklui juventude.
“Medida kontrolu lalais no efisiente sei ajuda hamenus risku transmisaun moras iha nivél lokál. Tanba ne’e, governu presiza fó prioridade ba área saúde, liu-liu iha implementasaun programa prevensaun no tratamentu ne’ebé asesível ba ema hotu-hotu”, dehan Konseleiru partidu, KHUNTO, José dos Santos Naimori Bucar iha areadores INCSIDA, I.P, 17/04/2026.
Naimori mós alerta katak falta orsamentu no rekursu sei sai dezafiu boot ida ba esforsu prevensaun iha rai laran. Nune’e, nia husu atu iha koordenasaun ne’ebé forte entre governu no parseiru sira atu hasa’e kualidade servisu saúde no garante populasaun hetan atendimentu adekuadu.
‘Esforsu konjuntu entre instituisaun públiku no privadu importante atu proteje saúde públiku no asegura futuru diak liu ba juventude Timor-Leste”. Naimori informa
iha sorin seluk Presidente INCSIDA, I.P, Daniel Marçal hatete, kolaborasaun entre organizasaun saúde no partidu polítiku importante tebes atu hasa’e konsiénsia públiku kona-ba prevensaun HIV/SIDA.
“Kolaborasaun entre organizasaun saúde no partidu polítiku importante tebes atu hasa’e konsiensia públiku kona-ba HIV/SIDA. Ami agradese ba lideransa KHUNTO ne’ebé fó oportunidade ba juventude atu partisipa iha formasaun ne’e no prepara an sai lider ho mentalidade diak,” hateten Daniel Marçal.
Entretantu tuir dadus ne’ebé aprezenta hatudu katak kazu HIV iha Timor-Leste kontinua aumenta, ho númeru aas liu iha kapital Díli.
“Dadus hatudu katak kazu HIV iha Timor-Leste aumenta, liuliu iha Díli kazu hamutuk 1893. Nune’e, importante tebes ba juventude atu halo teste regular no buka tratamentu lalais, tanba ema barak seidauk hatene sira nia estatutu saúde,” nia hakotu.
Relasiona ho seminariu ne’e hetan partisipasaun masimu husi Konseleiru partidu, KHUNTO, José dos Santos Naimori Bucar, Presidente INCSIDA, I.P, Daniel Marçal inklui juventude partidu polítiku KHUNTO ema 300.
Mudansa iha komportamentu no konsiensia individual importante tebes atu hamenus risku infeksaun, nune’e bele proteje an rasik no komunidade tomak. Ho esforsu hamutuk entre juventude, lideransa no instituisaun relevante sira, espera katak prevensaun HIV/SIDA iha Timor-Leste bele sai diak liu no asegura futuru saudável ba Jerasaun foun.
Jornalista/Eastajiáriu :Serafin dos Reis Jeronimo
Editor : Francisco Pereira
