(Díli) Lahane Ocidental, 16 Abril 2026 – Iha kanto ki’ik ida iha Lahane Ocidental, Celina Barros, inan ida ho tinan 70, kontinua hakat ba oin ho liman rasik, hodi halo no fa’an dosi loro-loron, nia la’ós deit buka moris ba nia-an, maibé lori responsabilidade boot atu ajuda sustenta beioan sira-nia edukasaun iha tempu ne’ebé ekonomia susar.
Bainhira loron matan sae, Celina hahú ona nia servisu iha uma laran. Ho ai-sunu, mina no ingrediénte simples sira, nia prepara dosi hodi fa’an ba komunidade sira iha areadór Lahane Ocidental, ba nia, atividade ida ne’e la’ós foun, maibé sai parte husi nia moris durante tinan barak.
Celina iha oan 7 mane rua no feto lima, maske nune’e, realidade la fasil, balun husi nia oan sira seidauk hetan servisu fixu, nune’e responsabilidade ba sustenta família liu-liu monu ba nia liman rasik. Beioan sira-nia eskola sai motivasaun boot ida ba nia atu kontinua luta, maske idade lao ba oin.
“Ha’u halo dosi hodi hetan osan atu ajuda beioan sira eskola,” hatete Celina ho lian ne’ebé simples maibé metin, iha nia hela fatin Lahane Ocidental foin lalais ne’e.
Nia hatutan katak loron ida, nia bele hetan entre $14 to’o $15, depende ba dosi ne’ebé fa’an. maske Osan ne’e la barak, maibé bele resolve ona problema nesesidade loro-loron.
Celina mós utiliza osan husi programa terseira idade atu fó kapital ki’ik ba nia negósiu dosi.
“Husi osan sira ne’e mak ha’u bele kontinua lori atividade ne’ebé fó renda ba família” dehan nia.
Iha situasaun ekonomia ne’ebé ladún estável, desizaun ida ne’e hatudu nia matenek no determinasaun atu la depende deit ba ajuda.
Maske hasoru limitasaun husi idade no kbiit isin ne’ebé la hanesan uluk, Celina la para. Nia kontinua hakat ho laran metin, hatudu katak idade la’ós barreira atu servisu no ajuda família. Perseveransa no espíritu solidariedade ne’ebé nia hatudu sai inspirasaun ba ema barak iha komunidade.
Iha kapitál Díli, moris loro-loron presiza gastu ba ai-sunu, mina no nesesidade seluk. Tanba ne’e, osan ki’ik mós iha valór boot ba Celina. Kada dolar ne’ebé nia hetan, nia uza ho kuidadu atu asegura katak beioan sira bele kontinua eskola no hetan futuru diak liu.
Istória Celina Barros la’ós deit kona-ba luta moris, maibé kona ba dominasaun laran ida atu la entrega ba situasaun. Iha nia dosi sira, iha esperansa, iha nia servisu, iha futuru ba jerasaun tuir mai.
Jornalista : Juliana Paicheco
Editor : Francisco Pereira
