(Díli) Jardim Motael– Loron-loron iha Jardím Motael, feto ida ho naran Imaculada Richa hala’o negosiu ki’ik ho esperansa atu sustenta família no asegura oan sira nia futuru. Maski enfrenta risku lakon sasan bainhira autoridade halo operasaun iha fatin públiku, nia nafatin kontinua luta ho kapital limitadu, hodi buka rendimentu ba moris lor-loron.
Ho kapital inisiál $50 dolares amerikanu, Imaculada hahú fa’an sasan simples hanesan sigaru, kafé, bee-manas, cappuccino no sasan ki’ik seluk. Nia hahú fa’an kada loron husi tuku 10 dadeer to’o tuku 6 kalan iha área Jardím Motael.
Maski negosiu ne’e seidauk fó rendimentu boot, Imaculada hatete katak kada loron nia bele hetan entre $8 to’o $10, no fulan ida dala ruma to’o de’it $50. Osan ne’e, tuir nia, uza hodi sosa ai-han no sustenta nesesidade família lorloron.
“ rendimentu la boot, maibé ajuda atu sosa ai-han no sustenta ami nia moris lorloron,” dehan Imaculada.
Nia esplika katak dalaruma nia la bele fa’an tamba presiza hela iha uma atu tau matan ba oan sira. Maski nune’e, nia nafatin esforsu atu kontinua nia negosiu atu bele fó futuru di’ak liu ba labarik sira.
Durante hala’o atividade iha fatin públiku, Imaculada mós enfrenta dezafiu oioin. Nia hatete katak dalaruma ekipa autoridade sira halo operasaun no foti sira nia sasan, tula ba kareta, situasaun ne’ebé halo sira lakon sasan no osan.
“Dalaruma ami lakon sasan tamba foti hosi autoridade sira, ne’e halo ami susar,” nia dehan.
Maski hasoru difikuldade hirak ne’e, Imaculada sei nafatin iha vontade forte atu kontinua nia negosiu. Nia espera katak iha loron ida nia bele hetan fatin permanente atu fa’an ho seguru no la presiza tauk atu lakon sasan.
Imaculada, ne’ebé kaben ho Grigorio de Jesus, mai husi Postu Administrativu Balibo, Suku Balibo, Aldeia Fatuk Laran. Nia iha oan nain rua, ida feto no ida mane, ho naran Estefanio de Jesus no Febriana de Jesus. Nia afirma katak negosiu ki’ik ne’e importante tebes atu sustenta família no asegura oan sira nia moris no edukasaun iha futuru.
Jornalista/Estajiadu : Serafin Dos Reis Jerónimo
Editor :Manuel Andrade
