(Díli, Taibesi) – Iha rai sidade Díli, besik iha merkadu Taibesi, iha barullu ema sira-nia halai ba mai, Aniceto de Deus, hanesan vendadór joven ida, kontinua hamrik ho esperansa ne’ebé la mate, nia esperiénsia uluk hanesan dudu gerobak la’ós halo nia para, maibé sai motivasaun foun atu nia habelar fali moris liu-husi negósiu fa’an sepatu.
Ba Aniceto, moris la’o hanesan luta loron-loron. Maske hetan difikuldade barak, nia la husik an atu monu.
“Buat ne’ebé motiva ha’u atu kria negósiu ba ha’u nia aan mak hanesan joven ida iha liman no ain kompletu lakoi tane liman ba ema seluk, ita nia maluk difisiensia deit sei buka rasik osan satan ita,” dehan Aniceto de Deus, iha Merkadu Taibesi foin lalais ne’e.
Hahú hosi ki’ik, Aniceto uza osan ne’ebé nia hetan husi servisu gerobak atu hahú fali nia negósiu rasik. Nia rai osan oituan-oituan, no liuhusi determinasaun ne’ebé forte, nia konsege loke fali negósiu fa’an sepatu iha merkadu.
“Husi negósiu ne’e, hau aprende barak husi ema seluk nia esperiénsia, maski rendimentu la boot, maibé bele ajuda sustenta moris loron-loron, liuhusi ida ne’e halo hau fiar katak ita tenke kreativu no persistente,” nia dehan.
Iha merkadu, Aniceto fa’an sepatu ba ema bo’ot no labarik ho presu ne’ebé bele asesu ba komunidade. Presu sira varia tuir tipu no kondisaun sasan, husi dolar rua to’o dolar lima-nulu. Kada loron, nia bele hetan rendimentu entre dolar sanulu to’o dolar lima-nulu, depende ba kompradór sira ne’ebé mai hola.
Maski nune’e, vida hanesan negosiante la fasil. Nia hatete katak difikuldade boot mak la iha garantia rendimentu fixu hanesan servisu iha kantor. Loron balu, kompradór la mai, bele halo rendimentu tun drastiku.
“Uluk bainhira ha’u dudu gerobak, ha’u senti todan tebes. Agora ha’u hili negósiu sepatu tanba bele la’o nafatin, maski susar, maibé la presiza uza forsa hanesan uluk,” nia konta ho oin triste.
Aleinde ne’e, kondisaun iha merkadu Taibesi mós sai dezafiu ida. Fatin ba vendadór sira limitadu no dala ruma sira tenke muda fatin tuir regulamentu. Maske nune’e, Aniceto nafatin adapta no kontinua buka dalan atu fa’an.
Estratéjia prinsipal ne’ebé nia uza atu atrai kompradór mak atendimentu diak, ba nia, komprende karakter hola na’in sira importante tebes.
“Ita tenki hatudu oin midar no hamnasa. Hola na’in ida-idak iha karakter diferente, entaun ita mak tenke adapta,” nia esplika.
Mane metan oan ne’e hatutan inovasaun iha negósiu importante atu halo diferenza. Hodi observa merkadu no analiza sasan sira ne’ebé fa’an, nia tenta halo mudansa oituan ba oituan, hanesan “eskada ba eskada” atu to’o ba susesu.
Iha tempu hanesan, Aniceto la haluha edukasaun. Ho idade 27, nia kontinua estudu iha Institute of Business (IOB), no kontinua hala’o nia negósiu atu sustenta moris no apoiu nia edukasaun.
Istória Aniceto nian hatudu katak maské hahú husi situasaun simples, ho determinasaun, kreatividade no persisténsia, ema ida bele transforma difikuldade sai oportunidade. Iha merkadu Taibesi, nia la’ós deit fa’an sepatu, maibé mós habelar esperansa ba moris di’ak liu iha futuru.
Jornalista: Inácio Silva
Editor: Francisco Pereira
