Díli (Taibesi)– Fa’an hanesan atividade ekonomia simples maibé iha papel boot tebes ba sustenta moris família, ema barak iha Timor-Leste hili atividade ida-ne’e atu hetan rendimentu loro-loron hodi atende nesesidade báziku sira hanesan han, hemu no selu oan sira nia eskola.
Negosiante fa’an na’an Antonio da Silva idade (60) orijen husi Munisípiu Aileu, kontinua halo fila liman ne’e hodi sustenta família maske ho rendimentu ne’ebé ki’ik.
Antonio iha oan na’in (8) maioria husi sira forma ona família uma-ka’in maibé iha oan rua (2) sei kontinua eskola iha nivel Sekundaria no oan ida seluk pre-sekundaria, husi atividade negósiu fa’an na’an iha merkadu Taibesi Antonio jere osan uitoan hodi selu labarik na’in rua (2) nia estudu no seluk atende ba nesesidade uma laran.
“negósiu ne’e la’ós ha’u nian rasik, maibé ha’u fa’an deit ema nian hafoin mak ha’u hetan uitoan husi ne’e” dehan Antonio ba Jornalista Média Mudansa iha merkadu Taibesi.
Atividade negósiu ne’ebé Antonio hahú husi tinan 2011 to’o mai agora, husi negósiu ne’e kada loron nia hetan ladun barak tanba sei fahe ba sasan na’in no ninian pursentu balun husi folin ne’ebé nia hetan.
“Patraun fó ha’u $ 300 ka $500 atu sosa na’an depois husi ne’e maka ha’u fa’an no hetan entre $10 to’o $15 kada na’an ho kilograma (50kg) karik na’an ne’e fa’an hotu,” nia hatutan.
Maske hetan komisaun ne’ebé la bo’ot, Antonio kontinua luta ho ida ne’e sai hanesan atividade prinsipal ba nia. Ba nia oan nia edukasaun prinsipal ba futuru aban bainrua nian
Ba futuru Antonio dehan katak depende ba kapital ne’ebé nia hetan karik ho rendimentu ne’ebé di’ak mak nia sei halo fila fali negósiu seluk.
“Sé ha’u fa’an mak sasan folin di’ak ka iha osan, ha’u bele halo negósiu seluk husi fa’an na’an, maibé se laiha, ha’u sei kontinua deit hanesan ne’e,” nia salienta.
Nune’e mós nia deklara difikuldade ne’ebé sira fa’an na’an iha merkadu Taibesi hasoru mak hanesan na’an fa’an la hotu tanba ema barak fa’an no situasaun seluk mak tenke iha jeleira atu prevene na’an sira hodi labele estraga.
“Maski ami fa’an na’an la estraga tanba ami iha jeleira, maibé se la fa’an hotu iha loron ida, difikulta atu hetan komisaun regular iha semana ida ne’e “ nia hakotu
Jornalista/Estajiada : Madalena da Silva
Editor :Manuel Andrade
